Roza Baǵlanovanyń mereıtoıy Reseıde de toılanady. Máselen, búgin Reseı astanasy Máskeý qalasynda halyqtyń súıikti ánshisiniń qurmetine fotokórme ashylyp, merekelik konsert ótti. Is-sharaǵa Qazaqstannyń Mádenıet jáne sport mınıstri Dáýren Abaev, zııaly qaýym men qazaq dıasporasynyń ókilderi qatysty.
«Osyndaı iri is-sharalar Qazaqstanda ǵana emes, basqa elderde de ótkizilip jatqany qýantady. Munda usynylǵan fotosýretterdiń árqaısysy Roza Baǵlanovanyń maǵynaly ómiriniń jarqyn sátterin ǵana emes, sonymen birge búkil dáýirdiń órleýin de beıneleıdi», dedi mınıstr kórmeniń ashylýynda.
Fotokórmede ánshiniń ómiri men shyǵarmashylyǵyn beıneleıtin 30-dan astam biregeı fotosýret usynylǵan. Kórme 7 bólimnen turady: «Birinshi Roza», «Soǵys jyldaryndaǵy erlik pen dańq», «Shyǵarmashylyq shyńy», «Ár án - jaýhar», «Búkil álemdi jaýlap alǵan Rozam», «Qoǵamdyq-saıası qyzmet» jáne «Halyq súıispenshiligine bólengen jarqyn ómir».
Aıta ketsek, bulbul ánshiniń 100 jyldyǵy IýNESKO-nyń ataýly kúnder kúntizbesine engizilgen, al qazan aıynda uıymnyń shtab-páterinde Roza Baǵlanovanyń qurmetine úlken konsert ótedi dep kútilýde. Al qarasha aıynda Nur-Sultan qalasynda halyqaralyq vokalıster baıqaýyn ótkizý josparlanýda.
«Roza Baǵlanova - dáýir sımvoly jáne halyqtyń súıiktisi. Qazaly óńirinen shyqqan týma talanttyń qazaq halqynyń mýzykasy men Qazaqstan kompozıtorlarynyń shyǵarmashylyǵyn elimizden tysqary jerlerge tanymal etýge jáne tanytýǵa qosqan zor úlesin aıtpaı ketýge bolmaıdy. Roza Baǵlanova Uly Otan soǵysy jyldarynda konserttik brıgada quramynda Qyzyl Armııa jaýyngerleriniń aldynda án aıtyp, maıdan dalasynan jaralanǵandardy alyp shyqty. Beıbit ýaqytta da Roza Tájibaıqyzy búkil álemge án shyrqap óner kórsetti, qoǵamdyq istermen belsendi aınalysty, qaıyrymdylyq sharalaryna qatysty», dep atap ótti Dáýren Abaev merekelik konsertte sóılegen sózinde.
