Kıyn kezeńdegi utymdy qadam

Osyndaı asa kúrdeli de qıyn kezeńde Qazaqstan astanasynda Álemdik jáne dástúrli dinder kóshbasshylarynyń VII seziniń ótýi – úlken tarıhı oqıǵa. Qazaqstanǵa alǵash ret memlekettik saparmen kel­gen Vatıkannyń jáne Kato­lık shirkeýiniń basshysy Rım Papasy Fransısktiń Qazaq eline arnaǵan sózin tyńdaý mártebesi buıyrdy. Rım Papasynyń Qazaqstandy tynyshtyq pen birliktiń uly eli dep ataýy, halqymyzdyń barlyq dinderge zor qurmetpen qaraıtyndyǵyn qazaqtyń qasıetti dombyrasynyń qos ishegimen úılestirýi erekshe oı tastady.

Rasynda, dombyranyń qos sheginiń úılesimdiligine bar dúnıe tirshiligi, adamı qarym-qatynastyń barlyq zańdylyqtary baǵynyp tur emes pe?! «Adamzattyń bárin súı baýyrym» dep Abaı hakim aıtqan qaǵıda búkil halyqtyń basty ustanymyna aınalmaıynsha, jer ústinde beıbitshilik ornamasy anyq.

2003 jyldyń 23-24 qyrkúıeginde Astanada ótken Álemdik jáne dástúrli dinder lıderleriniń I sezinen bergi ýaqytta dúnıe tynysy alqynyp, júrek soǵysy da jıilep, adam balasynyń Jaratqan bergen tirshilik úshin kúresiniń jantalasy kúsheımese, báseńsimegen syńaıly. Buǵan búgingi álem kýá.

Álemdik mańyzy bar túrli dinder lıderleri forýmynyń Uly Dala tósindegi qazaq jerin­de jınalýy jalpy adamzat ba­lasynyń ózara túsinýshilik jáne birin-biri qurmetteý, biriniń ýájin biri tózimdilikpen tyńdaı bilýi arqyly beıbit ómir súrý úshin bir qadam bolsa da ilgeri basqandyǵyn bildirse kerek.

Qazir zaman basqa, álem basqa. Qazaq eliniń de búgingi ustanymy basqa. Qazaq qoǵa­my ádildik izdep, laıyqty ómir súrýdi ańsap otyr. Biz­diń dúnıetanymymyz ben kózqa­ra­symyzdy ózgertken – Qańtar oqıǵasy. Qasiretti qańtar­da el tynyshtyqtyń baǵa­syna anyq kóz jetkizdi. Eldi jaılaǵan zańsyzdyq, jem­qor­lyq, ádi­let­sizdik sııaqty keleń­sizdikter halyqty tıtyqtatyp, ashý-yzasyn týdyrǵany anyq. Qazir eli­mizde ádil qoǵam ornatý, «Halyq únine qulaq asatyn memleket» qurý jáne Jańa Qazaqstandy ornyqtyrý jolynda tyń bastamalar qolǵa alynýda.

Elordada bastalǵan álemdik dinder kósh­bas­shylarynyń VII sezinde Prezıdent: «Bizdiń múddemiz jáne nıetimiz – bir. Bárimiz de beıbit ári berekeli bolashaqqa qadam basýdy qalaımyz», dedi. Osy biraýyz sóz búkil qazaq eliniń berik ustanymyn álem jurtshylyǵy aldynda bekemdete tústi.

Jabal ERǴALIEV,

Qazaqstannyń eńbek sińirgen qaıratkeri, Senatorlar keńesiniń múshesi