Trılogııany jeńispen túıindedi

«Bul án burynǵy ánnen ózge­rek» degendeı, bul jolǵy aı­qas buǵan deıingi eki kezdesýden múlde basqa jaǵdaıda ótti. Máse­len, 2017 jáne 2018 jyldary uıymdastyrylǵan birinshi jáne ekinshi jekpe-jek orta sal­maqta ótip, Golovkın rıngke chempıon retinde kóterilgen bola­tyn. Al «Kanelo» bolsa chem­pıondyq beldikke úmitker boks­shy retinde sharshy alańǵa shyq­qan edi. Tórt jyldan keıin qaıta uıymdastyrylǵan qos boksshynyń úshinshi kezdesýi bir sal­maq joǵary, ıaǵnı ekinshi orta sal­maqta ótip, bul joly Saýl ekinshi orta salmaqtyń chempıony re­tinde beldikterin qorǵady.

Taǵy bir erekshe toqtalyp óterlik jaıt, muhıttyń arǵy betin­degi boks keshinde án álemin­de dúnıe júzine tanylyp úl­ger­gen qazaqtyń áıgili ánshisi Dı­­mash Qudaıbergen Qazaqstannyń ánuranyn shyr­qady.

Jekpe-jek aldyndaǵy resmı is-sharalar aıaqtalǵan soń, ekinshi orta salmaqtyń «korolin» anyqtaıtyn jekpe-jek te bas­talyp ketti. Alǵashqy raýndta boks­shylar ádettegideı bir-birin ańdysýymen, kezdesýge qandaı daıyndyqpen, qandaı taktıkamen kelgenin barlaýmen boldy. Basqa-basqa, Golovkın men «Kanelo» bir-biriniń qarym-qabiletin, qandaı múm­kindikke ıe ekendikterin óte jaqsy biledi. Buǵan deıingi eki kez­desýdegi 24 raýndtyq aı­qas­ty aıtpaǵannyń ózinde, olar onyń aldynda talaı márte jat­tyǵý zalynda birge daıyndalyp, spar­rıng-seriktes retinde bir­neshe raýnd judyryqtasyp, ózara sheberlikterin shyńdaǵan.

Osyǵan deıingi birinshi jekpe-jekte Gennadıı Golovkın, boks­shylardyń tilimen aıtqanda, «birinshi nómirmen» jumys is­tese, keıingisinde Alvares rıng­tiń ortasynda bılik júr­gizýge tyrysqan edi. Al bul joly ekeýi de artqa sheginbeı, sharshy alań­nyń qaq ortasynda qasqaıyp turyp aıqasty.

Alǵashqy úsh raýnd teń jaǵdaı­da ótkenimen, tórtinshi raýnd­tan bastap «Kanelo» jyldam­dy­ǵyn arttyryp, dál soqqylardy kó­birek jumsaı bastady. Tipti ol ár shabýylyn kem degende eki soqqymen aıaq­taýǵa tyrysyp, upaı sanyna ju­mys isteı bastaǵanyn baı­qatty. Al Golovkın bolsa, tek djeb soqqylarymen ǵana shek­telip otyrdy. Kelesi raýnd­ta da meksıkalyq boksshy shıraq qımyldaǵanymen, jankúıerler tańdaı qaǵatyndaı qaýipti soqqy jasaı alǵan joq. Golovkın qar­sylastyń ashylýyn jáne qate­lesýin kútip, biraz soqqy jasaı almaı júrdi. Sondaı-aq dál osy raýndta otandasymyz fızıkalyq turǵyda sharshaı bastaǵan sııaqty kóringen-di. Keıingi raýndtarda baıqaǵanymyzdaı, Golovkın sharshamaǵan eken. Bul jaı ǵana jekpe-jek barysyndaǵy tak­tıkalyq oıyn ekenin bildik.

Segizinshi raýndtan keıin otan­dasymyz sharshy alańdaǵy belsendiligin arttyryp, qarsy­lasyna birneshe soqqysyn daryta aldy. Keıingi raýndtarda da Gennadıı táýekelge baryp, aldyńǵy eki jekpe-jek­tegideı meksıkalyqtyń yrqyna jyǵylyp, kanat arqyly sha­býylǵa kóshti. Abyroı bolǵanda, qorǵanyp júrip qarsylasyn oń­dyrmaı uratyn «Kanelo» da raýn­d sońynda sharshap, aýyr soqqy jasaýǵa áli kelmeı qaldy.

Sonymen 12 raýndqa jalǵas­qan tartysty jekpe-jektiń taǵdyryn tóreshiler sheshti. Birin­shi tóreshi tórt raýndtyq basym­dyqpen «Kanelo» jeńiske jetti dese (116-112), qalǵan eki tóreshi 115-113 esebimen meksıkalyq boks­shynyń basym bolǵanyn bil­dirdi. Osylaısha, Saýl «Kanelo» Alvares tóreshilerdiń biraýyz sheshimimen úshinshi jekpe-jekte jeńiske jetip, bes jylǵa so­zylǵan trılogııanyń núktesin qoıdy.

Jekpe-jek aldynda kópshilik boks mamany Golovkın bul kezdesýde nokaýtpen jeńiledi dep boljam jasaǵan edi. О́ıtkeni otan­dasymyz ózine úırenshikti orta salmaqta emes, baqandaı tórt kılo joǵary salmaqta judyryqtasty. Boksta bir kılo salmaqtyń ózi úlken mańyzǵa ıe ekenin eskersek, otandasymyz ózinen bir emes tórt kılo salmaq joǵary boksshynyń jaǵdaıyna túsip, onymen teń dárejede judyryqtasqanynyń ózin jeńis dep esepteýge bolatyn shyǵar.

CompuBox júıesiniń deregine súıener bolsaq, Golovkın bul joly da (ol alǵashqy eki kezdesýde de kóp soqqy jasaǵan) soq­qy jasaý jaǵynan belsendi bol­dy – 521. О́kinishke qaraı, onyń tek 120-sy ǵana dál tıgen eken. Al «Kanelonyń» soqqysy kem shyqqan – 487. Biraq sany az bol­ǵanymen, sapasy kóp, ıaǵnı dál tıegen soqqylarynyń sany – 130.

Djep soqqylar sany boıynsha da Gennadıı Golovkın alda boldy – 74-45. Al kúsh salyp jasaǵan soqqylar statıstıkasynda «Ka­nelo» aıqyn basymdyqqa ıe bol­ǵan eken. Máselen, Golovkın 171 kúshti soqqy jasap, onyń 46-syn ǵana qarsylasyna daryta alǵan. Alvarestiń 217 joıqyn soq­qysynyń 86-sy dóp tıgen.

Jalpy, Gennadıı úsh jekpe-jekte de jankúıerler esinde kóp soqqy jumsaǵan boksshy retinde qalady. Máselen, otandasymyz 2017 jylǵy birinshi aıqasta 703 soqqy jasaǵan bolsa, 2018 jylǵy ekinshi jekpe-jekte 879 márte soqqy baǵyttaǵan. Djeb boıynsha da dáldik tanytqan bolsa, kúshtik soqqyda báribir qarsylasynan kemshin túsip otyrǵan.

Jekpe-jektiń qorytyndysy Golovkın úshin sátti bola qoımasa da, ol rıngten ózine tıesili olja­men ketti. Otandasymyz 8 mln dol­lardy jambasqa bassa, Al­vareske 10 mln dollar buıyr­dy. Sondaı-aq eki boksshy jarnamadan, bılet satylymynan jáne aqyly translıasııadan túsken tabysty da ózara bólisedi.