«Jańa strategııanyń nátıjesinde óndiristik turǵyda jaqsy kórsetkishterge qol jetkizildi. Bıyl birinshi jartyjyldyqtaǵy taza tabys 1,6 mlrd teńgege jetti. Byltyr biz 4,8 mln jolaýshyǵa qyzmet kórsettik, al 2022 jyldyń qańtar-tamyz aılarynda jolaýshylar aǵyny 3,5 mıllıonnan asty. Jyldyń sońyna qaraı bul kórsetkish 5,3 mıllıonǵa jetip, tabys 68 mlrd teńge deńgeıinde bolady dep kútilýde. Bul ótken jylmen salystyrǵanda 15,8 paıyzǵa joǵary bolmaq», dedi Astana qalasyndaǵy áýejaıdyń ókili.
Áýejaıda shyǵyndardy ońtaılandyrý jáne qosymsha kiris túrlerin damytý arqyly tabystyń ulǵaıýyna qol jetkizilgen. Lokdaýn kezinde qarjylaı turaqtylyqty saqtaý úshin operasııalyq shyǵyndar qysqartylyp, turaqty tranzıttik júk avıareısteriniń úlken kólemin tartý maqsatynda aıtarlyqtaı kúsh-jiger jumsalǵan. Osylaısha, elder arasyndaǵy shekaralardyń jabylýy kezeńinde kóptegen sheteldik avıakompanııalar Astana áýejaıyn Eýropadan Azııaǵa tranzıttik aıaldama retinde paıdalana bastady.
«Qazirgi tańda mýltımodaldyq jáne tranzıttik júk tasymaldaryna basymdyq berý durys sheshim bolǵanyn kórip otyrmyz. 2021-2022 jyldardaǵy kiristiń shamamen 70%-y áýejaıdyń tranzıttik júk reısterine qyzmet kórsetýge qaıta baǵdarlanýy esebinen alynǵan. Áýejaı alǵash ret operasııalyq paıdaǵa shyǵyp, nesıe berýshiler aldyndaǵy barlyq mindettemeni oryndady», dep tolyqtyrdy D.Hamzın.
Alynǵan kirister esebinen kásiporyn defolttan qutylyp, tarıfterdi kótermeı-aq daǵdarys kezeńinen shyqty. Bul óz kezeginde otandyq avıakompanııalarǵa qatysty júktemeni azaıtty. Sonymen qatar lokdaýnǵa qaramastan, atalǵan áýejaı men onyń Kókshetaý qalasyndaǵy fılıalynyń 2 myńnan astam qyzmetkeri jumys oryndaryn saqtap qaldy. Kásiporyn qyzmetkerler aldyndaǵy barlyq áleýmettik mindetti tolyq kólemde ótep, eń tómengi jalaqy kólemin 40%-ǵa arttyrdy.
Jumys barysyndaǵy basymdyqtardy qaıta qaraý nátıjesinde áýe aılaǵynyń odan ári damýy úshin jaǵdaı jasaldy. Búgingi tańda kúzgi-qysqy navıgasııa jumystaryna daıyndyq júrgizilýde. Kez-kelgen aýa-raıy jaǵdaıynda úzdiksiz jumys isteý maqsatynda qar jınaıtyn 5 zamanaýı mashına satyp alyndy. Olar ushý-qoný jolaǵy men perrondy tazartýdy edáýir jyldamdatady.
