Gıpotermııa apparaty dúnıege kelgen kezinde aýa jetpeı qınalatyn nárestelerdi qutqarýǵa arnalǵan. Sharanalardyń arasynda mundaı aýytqý sırek te bolsa kezdesedi. Sondaı sátte náresteniń mıy aýyr asfıksııadan zaqym alýy múmkin. Sondyqtan bala dúnıege kelgen bette saýatty, jedel kásibı kómek kerek. Mundaı gıpotermııa jabdyǵy bolmaǵan kezde dárigerler qoldan kelgen áreketin jasaıtyn. Náresteniń aınalasyna muz salynǵan nemese sýyq sý quıylǵan paketter qoıylatyn. Jansaqtaý bólimindegi dárigerler men medbıkeler ondaǵan saǵat boıy jańa týǵan náresteniń ortalyq júıke júıesin qutqarý úshin arpalysyp, qajetti tómen dene temperatýrasyn qolmen ustap turýǵa tyrysatyn.
Mine, Oraldaǵy ortalyqqa berilgen osy gıpotermııa apparaty dáriger qaýymyn osy beınetten qutqardy. Jańa keshen metabolızmdi jáne náresteniń mıynda zaqymdanǵan jasýshalardyń qalpyna kelýin baqylap, qajetti temperatýrany avtomatty túrde ustap turady.
– 2007 jyldan beri osyndaı qaıyrymdylyq jobamen aınalysyp kelemiz. Sodan beri elimizde dál osy gıpotermııa apparatynyń ıgiligin 225 sábı kórip úlgeripti. Bul nárestelerdiń 92 paıyzy búginde aman-saý ósip, densaýlyǵy túzelip ketti. «Samuryq Qazyna» qorynyń kómegimen atqarylǵan mundaı bastamanyń mańyzy óte úlken! – deıdi AYALA qaıyrymdylyq qorynyń vıse-prezıdenti Elena Eskova.
Sońǵy úsh jyl ishinde Batys Qazaqstan oblysynda 9 sábı asfıksııa belgisimen dúnıege kelgen eken. Bul derttiń qaýiptiligi sonda – der kezinde tolyq kómek ala almaǵan sharana ómir boıyna múgedek bolyp qalýy, tipti shetinep ketýi de múmkin. Sondyqtan jańa medısınalyq keshendi batysqazaqstandyq dárigerlerdiń sábı densaýlyǵy úshin kúresinde asa qajetti qural deýge ábden bolady.
– Osy apparat arqyly bizdiń sábılerimiz týabitti aqaýynan tez arylyp, sozylmaly zardaptarynan qutylatyn boldy, – deıdi oblystyq perınataldyq ortalyqtyń neonatolog-dárigeri Natalıa Iаsenko.
Oblystyq perınataldyq ortalyǵynda jyl saıyn shamamen 6 myńdaı sábı ómir esigin ashady. Sonyń ishinde 300-deı náresteniń densaýlyǵynda túrli aýytqý bolyp jatady. Olar birden jansaqtaý bólimine nemese ıntensıvti terapııa bólimine jetkizilip, qajetti medısınalyq járdem kórsetiledi. Jyl basynan beri osyndaı 176 sharana dáriger kómegine zárý bolǵan.
– Bizdiń ortalyq 1985 jyly áıelder bosanatyn úı bolyp ashylǵan. 2006 jyldan beri óńirde eń iri akýsherlik, gınekologııalyq jáne neonatologııalyq kómek kórsetetin ortalyq retinde jumys isteıdi. 145 kereýettik bólimde 54 dáriger eńbek etedi. Ortalyqtyń qajetti medısınalyq jabdyqtarmen qamtylýy jaman emes, alaıda olar 63 paıyzǵa eskirip, tozdy. Sondyqtan mundaı zamanaýı jabdyqtyń kelgenine erekshe qýanyshtymyz. Samruk-Kazyna Trust jáne AYALA qorlaryna gıpotermııa apparaty men amplıtýdalyq elektrensefalografııa monıtory úshin alǵys aıtamyz», – dedi oblystyq perınataldyq ortalyǵynyń dırektory Janna Dilmanova.
Batys Qazaqstan oblysy
