«S» dıvızıonynyń úshinshi tobynda Belarýs, Slovakııa jáne Ázerbaıjanmen birge óner kórsetken Qazaqstan ulttyq quramasy sońǵy týrǵa deıin tórt oıynda jeńiske jetip, bir matchta teń nátıjege qol jetkizdi. Osylaısha, merziminen buryn maqsaty oryndalǵan jerlesterimiz jeńispen bastalǵan týrnırdi jeńispen aıaqtaýǵa umtylǵan edi. Biraq besinshi týrdaǵy jeńistiń eıforııasy sońǵy týrdyń matchyna keri áserin tıgizip, Ulttar lıgasyn bylaı qoıǵanda, bıyldyqqa birinshi ret jeńilistiń kermeký dámin tatty. Ázerbaıjanǵa sapar shekken ulttyq qurama ókilderi Bakýdegi básekede alań ıelerinen 0:3 esebimen jeńilip qaldy.
Negizi bizdiń jigitterdiń Ázerbaıjanmen eń quryǵanda teń oınaýǵa tolyq múmkindigi bar edi. Alaıda qorǵaýshy Nuráli Áliptiń bolmaıtyn jerde qyzbalyqqa salynyp, oıyn erejesin óreskel buzýy ulttyq quramanyń iri jeńilisine alyp keldi. Matchtyń 30-mınýtynda-aq «Zenıttiń» qorǵaýshysy tóreshi tarapynan «qyzyl qaǵazben» jazalanyp, birinshi taımda áriptesterin qıyn jaǵdaıǵa qaldyrdy. «Astana Arenada» Belarýs quramasymen ótken tarıhı matchtan keıingi baspasóz máslıhatynda jýrnalıster Mıhaıl Gabyshevten: «Magomed Adıev taktık bapker me, álde motıvator ma?» degen suraq qoıdy. Sonda Gabyshev: «Ol kóbine bizge qajetti sózderdi taýyp aıtady. Soǵan qaraǵanda, motıvator bapker sııaqty», dep jaýap bergen edi. Iá, Adıev jigitterdiń oıynyna ózgeris ákelgen myqty motıvator bapker shyǵar, biraq endi oǵan qosymsha psıholog mamandyǵyn da meńgerýge týra kelip tur. О́ıtkeni dál qazirgi ýaqytta bizdiń jigitterge eýropalyq minez, jeńimpazdyq rýh jetispeıdi. Áıtpese, keshegi oıynda ulttyq qurama teń nátıje kórsetip, Ulttar lıgasyn joǵary notada aıaqtaýǵa tıis edi. Bir qateliktiń saldary bir oıynǵa ǵana keri áserin tıgizse meıli ǵoı, endi N.Álip kelesi jyly Eýropa chempıonatyna joldama beretin pleı-off matchynyń alǵashqysyna qatysa almaıdy.
Alaıda ár nárseniń óz qaıyry bar emes pe?! Osy jeńilistiń ózi bas bapkerge qaı baǵytta jumys isteý kerek ekenin aıqyndap berdi. Ony Magomed Adıevtiń ózi de moıyndap otyr.
– Búgingi jeńilis maǵan aýyr tıdi. Bir jaǵynan osylaı bolǵanyna da qýanyshtymyn. Ári qaraı damý úshin oılanatyn jáne taldaý jasaıtyn dúnıelerdiń bar ekenine kóz jetkizdik. Jalpy alǵanda, týrnır kestesindegi pozısııamyz ben jetken jetistigimizge kóńilim tolady. Biz úshin bul – úlken qadam. Búgingi jeńilis osal tustarymyzdyń bar ekenin kórsetti, – dedi bas bapker matchtan keıingi baspasóz máslıhatynda.
Bizdiń toptaǵy ekinshi oıynda Slovakııa óz alańynda Belarýs quramasyn qabyldap, 1:1 esebimen teń tústi. Oıyndaǵy esepti birinshi bolyp qonaqtar ashqanymen, ekinshi taımda alań ıeleri tarazy basyn teńestirip úlgerdi.
Osylaısha, «S» dıvızıonynyń úshinshi tobynda Qazaqstan quramasy alty oıynda 13 upaı jınap, birinshi orynǵa taban tiredi. Ekinshi oryndy 10 upaıy bar Ázerbaıjan quramasy ıelense, FIFA reıtınginde TOP-50 quramanyń qatarynda júrgen Slovakııa úshinshi orynǵa túsip qaldy. Enshisinde 7 upaı bar. Al Belarýs úsh upaımen sońǵy orynǵa jaıǵasty. Endi olar «S» dıvızıonyndaǵy ornyn saqtap qalý úshin elekti match ótkizedi.
