Týrızmdi damytýǵa talpynys

Oblystyq kásipkerlik jáne týrızm basqarmasynyń basshysy Nurbol Jańabekovtiń málimetine súıensek, bıyl týrızm salasyna sıfrlandyrýdy engizý maqsatynda 6 eskertkishke QR-kod ornatyldy. Sondaı nysandardyń qatarynda Saraıshyq qalashyǵy, Sa­raıshyq mýzeı qoryǵy, qazaqtyń kúı anasy atanǵan Dına Nurpeıisova, ás­kerı ushqysh, Halyq Qaharmany Hıýaz Dospanova, Ánuran avtory, Memlekettik syılyqtyń laýreaty, aqyn Jumeken Nájimedenov, qıyn kezde óńir turǵyndary azyq retinde qoldanǵan qumarshyq ósimdigine qoıyl­ǵan eskertkish bar. Endi kez kelgen adam, onyń ishinde óńirge saıahattap kelgen týrıster QR-kod arqyly atalǵan eskertkishter týraly 5 tilde aqparat alýyna bolady. Tipti eskertkishterdiń 3D kórinisin tamashalaýǵa múmkindik jasalyp otyr. Bul úshin «Tarihi jol» qosymshasyn júkteý qajet. QR-kodta eskertkishterdiń qaı jyly orna­tyl­ǵany, tarıhy týraly tolyq aqparat jazylǵan.

– Eki jyl buryn Atyraý oblysynda týrızm salasyndaǵy ınvestısııa kólemi 20,5 mlrd teńgeni quraǵan edi. Al byltyrǵy ınvestısııa 27,5 mlrd teńgeni qurap, aldyńǵy jylmen salystyrǵanda 34,15%-ǵa artty. О́tken jyly ishki jáne kirý týrızmi boıynsha 46 myń 200 adamǵa 1 mlrd 675 mln teńgeniń qyzmeti kórsetildi. Oblysta osy salada qyzmet kórsetetin 40-tan astam týrıstik mekeme men 106 ornalastyrý orny bar, – deıdi Nurbol Jańabekov.

Onyń aıtýynsha, 2021-2025 jyl­darǵa arnalǵan Atyraý obly­synyń áleýmettik-ekonomıkalyq damýy­nyń keshendi josparyna sáıkes 10,8 mlrd teńgeniń 9 ınvestısııalyq joba­syn júzege asyrý qolǵa alyndy. Bul jobalarda 338 jumys ornyn ashý jospar­lanǵan. Máselen, «Saraıshyq» vızıt orta­lyǵynyń qurylysy bıýdjet esebinen qarjylandyrylsa, 8 joba jeke ınves­tısııa esebinen iske asyrylyp jatyr.

– Keshendi jospardaǵy 9 jobaǵa «Nurly tal» etnoparki, «Keremet park» attraksıony men belsendi otbasylyq demalys parki, «Saraıshyq» vızıt-ortalyǵy, «Eldorado» demalys ba­za­­sy, Inder aýdanyndaǵy tuzdy kól jaǵa­laýyndaǵy shıpajaı-saýyq­tyrý kesheni, Qurmanǵazy aýda­nyndaǵy týrıs­tik balyq aýlaý bazasy men «Qı­ǵash» týrıstik bazasyn qaıta jań­ǵyrtý, Isa­taı aýdanyn­­daǵy «AMANDYQ», Maqat aýdanyn­daǵy kem­pıng kiredi, – deıdi oblystyq ká­sip­kerlik jáne týrızm basqarmasynyń basshysy Nurbol Jańabaev.

Qazir 4 joba iske qosylǵan. Bular – «Nurly tal» etnoparki, Qurmanǵazy aýdanyndaǵy eki týrıstik-demalys ba­za­sy men Maqat aýdanyndaǵy ashylǵan kempıng.

Atyraý oblysy