T.Dúısenova Memleket basshysy óz Joldaýynda jastardy jumyspen qamtýdy qamtamasyz etý jáne eńbek resýrstarynyń sapasyn arttyrý máselelerine erekshe nazar aýdarǵanyn atap ótti.
«Jyl saıyn respýblıka boıynsha 300 myńnan asa jas eńbekke qabiletti jasqa jetip, eńbek naryǵyna shyǵady. 2030 jylǵa qaraı jumys kúshindegi jastar úlesi 60 paıyzǵa jetedi dep kútilýde. Olardyń jumyspen qamtylýyn qamtamasyz etý úshin memlekettik jáne jeke bastamalar aıasyndaǵy jobalar boıynsha jyl saıyn jastar úshin memleket tarapynan sýbsıdııalanatyn 100 myńnan asa jumys oryndary ashylady. Jastardy jumyspen qamtýǵa járdemdesýdiń belsendi sharalarymen qamtý keńeıedi. Jyl saıyn 40 myń túlek jastar tájirıbesine qatysady. «Dıplommen – aýylǵa!» baǵdarlamasyna qatysýshylar úshin jastar tájirıbesiniń bóligi retinde tólenetin tıisti tólemderge teń bolatyndaı qosymsha járdemaqy belgilenedi. «Alǵashqy jumys» jobasy UBT tapsyra almaǵan nemese oqýyn jalǵastyrmaǵan mektep túlekterine arnalyp, qaıta baǵyttalady», dedi T.Dúısenova.
Prezıdenttiń tapsyrmasy boıynsha mınıstrlik agrokredıttik korporasııamen birlesip, jastardyń kásipkerlik bastamalaryn qoldaý maqsatynda jyldyq mólsherlemesi 2,5 paıyzben jeńildetilgen nesıe berýdiń tetikteri men parametrlerin ázirlep jatqanyn qosymsha aıtyp ótti. Jyl saıyn bul qoldaýdy 6 myńǵa deıin jas paıdalanady. Bul maqsattarǵa bıýdjette qarastyrylǵan soma jyl saıyn shamamen 30 mlrd teńgeni quraıdy. Halyqtyń áleýmettik osal toptaryndaǵy jastarǵa bıznes-ıdeıalaryn júzege asyrý úshin jyl saıyn 1,2 mln teńgeden asa somaǵa 9 myń qaıtarymsyz grant beriledi.
Sonymen qatar elimizdiń soltústik jáne ortalyq óńirlerine retteletin ishki kóshi-qondy uıymdastyrý tásilderi qaıta qaraldy. Árbir qabyldaýshy óńir qonys aýdarýdy yntalandyrý úshin jumys kúshi tapshylyǵyn sezinip otyrǵan ekonomıkanyń basym sektorlaryn anyqtaıtyn arnaıy óńirlik baǵdarlama ázirleýde. Elimizdiń basqa óńirlerinde qurylǵan qoldanystaǵy bıznes-jobalardy kóshirýdi jáne keńeıtýdi kózdeıtin soltústik jáne ortalyq óńirler úshin 100 bıznes-jobadan turatyn keıs qalyptasady. Qonys aýdarýdy yntalandyrý úshin qonys aýdarý aýmaǵyndaǵy turǵyn úı qunynyń 50%-yna deıin ótemaqy alýǵa quqyq beretin utqyrlyq sertıfıkaty engiziledi.
«Memleket basshysy aıqyndaǵan kelesi basymdyq – halyqtyń tabysyn arttyrý, jumys isteıtin azamattardyń quqyqtaryn qorǵaý jáne halyqtyń áleýmettik osal sanattaryn qoldaý sharalaryn kúsheıtý. Atalǵan tapsyrmany oryndaý maqsatynda Dúnıejúzilik bankpen birlesip, eń tómengi jalaqyny belgileý ádistemesin ázirleýge kiristik. Jumysty kelesi jyldyń naýryz aıynda aıaqtaý josparlanǵan. Ádistemeni iske asyrý negizgi áleýmettik-ekonomıkalyq kórsetkishterdi eskere otyryp, eń tómengi jalaqy mólsherin belgileýge teńgerimdi paıymdy qamtamasyz etedi. Prezıdent jarııalaǵan kelesi jyldyń 1 qańtarynan bastap eń tómengi jalaqyny kóterý bastamasy jalaqysy eń tómengi jalaqy deńgeıinde bolǵan 1 mln 800 myń qyzmetkerge áser etedi. Ol sondaı-aq basqa jumys isteıtin azamattardyń eńbekaqysyna sanattary men biliktilikteriniń yqpalyn eskere otyryp, olardyń tabysyn arttyrady. Sonymen qatar jyl basynan beri júrgizilgen kelissózder nátıjesinde 1,8 myńǵa jýyq jumys berýshi 1,2 mln-nan asa jumysker jalaqysyn ortasha eseppen 5-ten 50 paıyzǵa deıin ósirdi», dedi T.Dúısenova.
2023 jyldan bastap jumysynan aıyrylǵany úshin tólenetin áleýmettik tólemderdiń mólsheri de jumyspen qamtylǵan azamattar tabysynyń 45%-yna deıin ulǵaıtylady. Vedomstvo basshysy balaly otbasylardy qoldaý ulttyq saıasattyń basymdyǵy bolyp qala beretinin basa aıtty. Úkimet pen Ulttyq bank Memleket basshysynyń 2024 jyldan bastap «Balalarǵa arnalǵan ulttyq qor» jobasyn iske qosý týraly bastamasyn iske asyrý tetigin ázirleýde. Bala kútimi boıynsha tólem merzimin 1 jastan 1,5 jasqa deıin uzartý jumys isteıtin ata-analarǵa da, jumys istemeıtin ata-anaǵa da qatysty bolady.
