«AMANAT» partııasy Almaty qalalyq fılıaly atqarýshy hatshysynyń orynbasary Qaırat Bısembaev tuǵyrnamada Qazaqstannyń basty qoǵamdyq kúshiniń bolashaqqa degen kózqarasy, damý baǵdarlary, ustanymdary men saıası maqsattary qamtylǵanyn atap ótti. Onyń aıtýynsha, partııanyń jańa ıdeologııalyq qujaty adamnyń, qoǵam men memlekettiń úılesimdi damýy, olardyń ózara qarym-qatynasy prınsıpine qurylǵan.
Al Almaty qalalyq máslıhatyndaǵy «AMANAT»-tyń depýtaty Bekbol Ramazan tuǵyrnamanyń «Azamattyq qoǵam – damýdyń kepili» taraýyna erekshe toqtaldy.
«Osy taraýda «Jastar – el bolashaǵy. Biz belsendi azamattyq ustanymy bar jańasha oılaıtyn jastardyń tyń ıdeıalaryn árqashan qoldaımyz» delinedi. Tuǵyrnamada óskeleń urpaq máselesine aıryqsha mán berelip otyrǵanyna óz basym erekshe qýanyp otyrmyn», dedi depýtat.
Bul rette, keńes múshesi, QR Ulttyq ǵylym akademııasynyń akademıgi, Sh.Ýálıhanov atyndaǵy Tarıh jáne etnologııa ınstıtýtynyń burynǵy dırektory Hankeldi Ábjanov mańyzdy qujatta kórinis tapqan ult saýlyǵy máselesine mán berdi.
«Máselen, osy elimizde dáriger mamannyń tapshylyǵyn kórip otyrǵan eldi mekender bar. Meniń oıymsha, kemi 500 adam turyp jatqan aýyldyq jerlerde mindetti túrde dáriger bolýy kerek», dedi ol.
О́z kezeginde, keńes tóraǵasy Qarakóz Súleımenova jańa Saıası tuǵyrnama partııa músheleri, sarapshylar, ǵylymı jáne shyǵarmashylyq zııaly qaýym ókilderi, belsendi azamattar birlese talqylaǵan pikirtalastyń nátıjesinde paıda bolǵanyn jetkizdi.
«AMANAT» partııasy árqashan qoǵamdyq-saıası prosesterdiń bel-ortasynan tabylady. Partııada túrli pikir men kózqarasqa oryn bar. Sondyqtan tuǵyrnamany ázirlegen jumys toby partııa músheleri joldaǵan myńnan astam usynysty nazarǵa aldy», dep Qaragóz Súleımenova otyrysty qorytyndylady.
