Antonıý Gýterrısh óz sózinde búginde senim men yntymaqtyń álsirep bara jatqanyn, sonymen birge qaqtyǵystardyń geosaıası shıelenisiniń artyp otyrǵanyn atap ótti. Sondaı-aq ol búginde daǵdarys halyqtyń eń osal toptaryna áser etip, kedeıshilikti, ashtyqty tereńdetip, qoǵamdyq-saıası tolqýlardy qozdyryp otyrǵanyn aıtty. Osy asa qıyn jaǵdaıda, BUU Bas hatshysy shaqyrǵandaı, aımaqtyq yntymaqtastyqty nyǵaıtý burynǵydan da mańyzdyraq.
«Men aımaqtyq aldyn alýdy jáne aımaqtyq uıymdarmen ózara árekettesýdi kórsetetin beıbitshiliktiń jańa kún tártibin qurýǵa shaqyramyn. Sońǵy 30 jylda AО́SShK Azııa elderi arasyndaǵy mańyzdy dıalog alańyna aınaldy. Biz barlyǵymyz beıbit jáne gúldengen Azııadan paıda kórip otyrmyz, men seriktestigimizge, ortaq maqsattarymyzǵa – turaqty damýdy ilgeriletýge, adam quqyqtaryn, beıbitshilik pen turaqtylyqty ilgeriletýge, kópjaqty yntymaqtastyqty nyǵaıtýǵa rızamyn. Zamanymyzdyń synaqtaryn birge eńserip, Azııa men álemniń jaqsy bolashaǵyn qamtamasyz eteıik», dedi Antonıý Gýterrısh óziniń beıne úndeýinde.
Búgin Astanada Qazaqstan Prezıdenti Qasym-Jomart Toqaevtyń tóraǵalyǵymen Azııadaǵy ózara is-qımyl jáne senim sharalary keńesiniń (AО́SShK) VI sammıti ótip jatyr. Otyrysqa Ázerbaıjan, Irak, Iran, Qyrǵyzstan, Palestına, Tájikstan, Reseı, Túrkııa, О́zbekstan, Katar, Belarýs sııaqty 11 eldiń memleket basshylary qatysýda. Elordaǵa Vetnamnyń vıse-prezıdenti, Qytaı Halyq Respýblıkasynyń vıse-prezıdenti jáne bes mınıstr de keldi.
