Jaqyn arada qundy qujattar tolyqtaı ana tilinde sóılep, zertteýshilerge qoljetimdi bolady. Materıaldardyń deni Aqmola oblysynyń sol jyldary bolǵan Aqmola jáne Atbasar aýdandarynyń tarıhyna qatysty.
«Qala tarıhy az zertteldi. Sebebi ol kezde is-qaǵazdardyń basym bóligi arab grafıkasy arqyly júrgizildi. Qazirgi tańda arab jazýyn bilip, odan aýdarma jasaýmen aınalysatyndar az. Onyń ústine aýdarma jumysy qyrýar qarjy men kóp eńbekti qajet etedi. Budan bylaı arab qarpimen jazylǵan astanalyq muraǵat qujattary týǵan ólkesin zertteýshiler úshin asa qundy tarıhı derekkóz bolmaq», deıdi qalalyq arhıv dırektorynyń orynbasary Jangeldi Bımoldın.
Qazirdiń ózinde qordyń birneshe muraǵattyq isteri aýdarylǵan. Aýdarylǵan qujattardyń tarıhshylar men ólketanýshylar úshin mańyzdylyǵyn eskere otyryp, olardy baspaǵa daıyndaý qolǵa alynypty. Sondaı-aq 1920 jyldary aýdandastyrý taqyrybyn tolyq ashý maqsatynda kırıllısamen jazylǵan qujattar jınaqqa engizilgen.
Arhıvshiler qujattardy hronologııalyq jáne taqyryptyq prınsıp boıynsha júıelep, keıbir materıaldardy alǵash ret ǵylymı aınalymǵa engizgen eken. Atap aıtqanda asharshylyqqa ushyraǵan halyqqa kómek kórsetý, aýyldardyń atyn ózgertý, mektep ashý máseleleri qamtylǵan jergilikti atqarýshy organdardyń jınalys hattamalary úlken mańyzǵa ıe.
Bul basylym oqyrmandarǵa el tarıhyndaǵy kóptegen kóleńkeli sátterdi túsinýge múmkindik beredi. Ony qurastyrýshylardyń maqsaty – buryn paıdalanylmaǵan muraǵat materıaldaryn ǵylymı aınalymǵa engizý.
J.Bımoldınniń aıtýynsha, bıýdjette qarajattyń joqtyǵy ony jarııalaýǵa kedergi bolýy múmkin. Sondyqtan arhıv qyzmetkerleri demeýshi izdep, Aqmola óńiriniń tarıhyna beıjaı qaramaıtyn azamattardyń qoldaýyna úmit artyp otyr.
