Jylý ortalyǵynan tartylatyn trassanyń uzyndyǵy – 22 shaqyrym. Jobaǵa 22,7 mlrd teńge bólingen. Búginde atalǵan qarjyǵa shaqtalǵan jumys tolyq atqaryldy. Aldaǵy ýaqytta taǵy qarajat berý josparda tur. Byltyr – 8, bıyl 6 shaqyrymy tóseldi. 4 sorǵy stansasynyń 3 stansasy salynyp bitti. Qarajat ýaqtyly bólinse, jergilikti bılik ókilderi 1,5 jyl ishinde jobanyń sátti aıaqtalaryna senimdi.
Qaraǵandy oblysyna kelgen saparynda Prezıdent Qasym-Jomart Toqaevtyń da nazarynan qalanyń jylý júıesi qalys qalmaǵan-tyn. Prezıdent Qaraǵandynyń qarqyndy damýyn eske salyp, qalany odan ári órkendetý úshin qosymsha jylý kózderi kerektigin aıtqan edi. Osy rette Úkimetke Qaraǵandy qalasynyń úshinshi jylý jelisiniń qurylysyna qajetti qarajatty shuǵyl bólýdi mindettegen bolatyn.
Qaraǵandy qalasynyń burynǵy jylý beretin jelileriniń shamasy qazirgi qurylysqa tótep bere almaıdy. Jańa magıstral iske qosylǵanda odan jetetin jylýdyń qýaty saǵatyna 523 gıgakalorııany quraıdy. Sý jańa jylý magıstrali shahardyń Ońtústik-Shyǵys bóligin qamtamasyz etedi.
– Joba 2020 jyly bastaldy. Qazirgi ýaqytta 3-JEO-dan №1 sorǵy stansasyna jeli tartyldy. Jeli – eki qatar. №1 sorǵy stansasynyń daıyndyǵy – 90 paıyz. №2 sorǵy stansasy – 60 paıyz, №3 sorǵy stansasy – 90 paıyzǵa ázir. №4 sorǵy stansasy salynyp jatyr. Búginde Respýblıka dańǵylynan bastap, Táttimbet kóshesine deıin jeli tóseldi. Sebebi ózderińizge málim, qalanyń bul bóliginde qurylys qarqyndy, – deıdi qalalyq qurylys bóliminiń basshysy Murat Kamalıev.
Magıstral qurylysynda bas merdiger – «NS Sıstema» JShS-i. Kompanııanyń atqarýshy dırektory Qanat Botbaev atqarǵan jumystaryna 5 jyl kepildik beriletinin jetkizdi. 20 jyldan beri ınjenerlik jeli salasyndaǵy kompanııa kóptegen jobaǵa qatysqan. Buǵan deıin Ońtústik-Shyǵysty jylýmen qamtıtyn M-10 trassasyn keńeıtýge, M-3, M-5 jylý jelisin rekonstrýksııalaýǵa da úles qosty.
– Jobany iske asyrýda eshqandaı problema joq. Barlyǵy kestege jáne qarjylandyrýǵa sáıkes júzege asyp keledi. Jumystyń 70 paıyzy aıaqtaldy. Reseılik jáne otandyq qubyrlar tóseldi. Jobanyń aıaqtalýy qarjylandyrýǵa tikeleı baılanysty, – deıdi Qanat Botbaev.
Joba boıynsha 40 shaqyrym qubyr tóseledi. 4 sorǵy stansasymen birge 3 pavılon qarastyrylǵan. Sorǵy stansasynyń negizi mindeti – qajetti qysym alý úshin sý jiberý.
«Qaraǵandy-Teplotranzıt» JShS bas ınjeneri Ivan Vytkınniń málimdeýinshe, úshinshi jylý jetkizý magıstraliniń qurylysy sheshimin tabýǵa suranyp turǵan másele. Buǵan sebep – joǵaryda atap ótkenimizdeı, qarqyndy qurylys.
– Qazirgi ýaqytta jylýmen jabdyqtaýda problema joq. Alaıda jańa úıler men ǵımarattardyń qoldanysqa berilýi aldaǵy ýaqytta jylýǵa tapshylyq týdyrady. Jańadan salynyp jatqan jylý magıstrali sonyń aldyn alady. Sonymen qatar jylý júıesiniń jetkizilýine senimdi kúsheıtedi. Jobada magıstraldiń qazirgi qoldanystaǵy M-3, M-5, M-10 magıstralimen baılanysy qarastyrylǵan. Iаǵnı jelide qandaı da bir qıyndyqtar oryn alsa, bul qubyrlardy jylý berýge qosa alamyz, – deıdi Ivan Vytkın.
Qaraǵandy jylý júıesiniń 70 paıyzdan astamy tozǵan. Sondyqtan da jańa jelilerdiń bir-birimen baılanysy jylý júıesinde oryn alýy múmkin qıyndyqtardy eńserýge yqpal etpek. Al jańa jylý magıstraliniń qýaty dál osyndaı kólemdegi bir shaǵyn aýdandy jylytýǵa jetedi.
QARAǴANDY
