Almaty – Qonaev avtomagıstraliniń boıynda ornalasatyn G4 City jobasy aıasynda Gate District, Golden District, Growing District jáne Green District atty tórt zamanaýı aýdan salynatyny habarlandy.
«Gate Distrtict aýdany qarjylyq-iskerlik klasteri, Golden District aýdany bilim berý jáne medısınalyq klaster retinde damıdy. Al eksportqa beıimdelgen saýda-logıstıka jáne ınnovasııalyq-ındýstrııalyq ónerkásip nysandary Growing District aýdanyna shoǵyrlanady. Green District mádenıet jáne demalys aýdanynda kýrorttyq keshen, gemblıng ındýstrııa nysandary men arnaýly parkter ornalasady. Damý perspektıvasy boıynsha G4 City 2,2 mıllıonǵa deıin halyq mekendeıtin ıntegrasııalanǵan qala retinde damıdy. Sheteldik ınvestorlardy belsendi tartý maqsatynda qalada arnaıy ekonomıkalyq aımaqtar qurý, jańa halyqaralyq áýejaı salý josparlanǵan», delingen habarlamada.
Memleket basshysy atalǵan joba burynnan talqylanyp kele jatqanyn eske salyp, ınvestorlordan jobanyń júzege asyrylý merzimin naqtylady. Sondaı-aq Prezıdent ınvestorlarǵa G4 City qalasynda qoljetimdi baspana salý, qala ornalasatyn aýmaq halqyn turǵyn úımen qamtamasyz etý máselesin qarastyryp, jobanyń áleýmettik jaǵyna da mán berý kerek ekenin atap ótti.
Almaty oblysy ákimi Marat Sultanǵazıev pen Qarjy mınıstri Erulan Jamaýbaevqa G4 City qalasyn damytý jónindegi bas jospardyń tujyrymdamasyn bekitý máselesine qatysty birqatar tapsyrma júktedi.
