Ár tórtinshi balaǵa – 50 myń teńge

Bıyl shyǵysqazaqstandyq analar úshin jaǵymdy jyl bolyp otyr. Oblystyq máslıhattyń sheshimimen tórtinshi bala týǵan óńirdegi árbir ana 50 myń teńge mólsherinde áleýmettik kómek alatyn boldy. Aımaq ekonomıkasy órge basqan saıyn atalǵan áleýmettik kómektiń kólemi de ulǵaıa túspek. – Bizdiń óńirimiz mundaı ıdeıany elimizde birinshi bolyp qolǵa aldy. Aldaǵy ýaqytta kásipkerler men kásiporyndar da kópbalaly analardy qoldaıdy dep oılaı­myz. О́ńirimizde kópbalaly jas otbasylardyń kóbeıgenin qalaımyz, – dedi aımaq basshysy Berdibek Saparbaev kópbalaly analarmen kezdesýde. Sondaı-aq, oblys basshylyǵy barsha kópbalaly analarǵa tanymal saýyqtyrý-emdeý keshen­derine sertıfıkattar tabys etti. Onyń ishinde Alakól, Rahman qaınary, Kóktaý syndy demalys oryndary men О́skemendegi etnoaýyl, basseın, teatr jáne taǵy basqa áleýmettik-mádenı oryndarǵa jyl boıy tegin kirýge arnalǵan abonementter bar. Shyǵys óńirinde 16 myńnan astam kópbalaly ana turady. Olardyń barlyǵy «Altyn alqa», «Kúmis alqa», erterekte berilgen «Batyr ana» ataqtaryna ıe jáne «Ana dańqy» ordenimen ma­rapattalǵan jandar. Sondaı-aq, 8 myńǵa jýyq ana kámelettik jasqa tolmaǵan tórt baladan asatyn otbasylardyń uıytqysy bolyp otyr. Kezdesýge oblystyń barlyq qalalary men aýdandarynan 40-qa jýyq kópbalaly ana qatysty. Olardyń arasynda qysqy Azııa oıyndarynyń eki márte chempıony Marııa Fedorenko, «Shyǵys» óńirlik qolbasshylyǵy áskerı orkestriniń konsertmeısteri Olga Saǵyndyqova, О́skemendegi ana men bala ortalyǵynyń dırektory Raıa Rahımova syndy qoǵamda belsendiligimen kózge túsip júrgen jandar bar. Kezdesýge Zaısan qalasynan kelgen Bıbátish Rahymjanova seksenniń ekeýine shyqqan eken. Ájeıdiń balalyq shaǵy soǵys jyldaryna tap kelse de, tylda aýyr eńbek ete júrip, 8 balasyn ósirip, jetkizgen. Elimizde túrli salada jemisti eńbek etip júrgen balalardyń anasy qazir 24 nemere men 6 shóbere súıip otyr. – Barlyq jas qyz-kelin­shek­terimizge ana baqytyn tileımin. Biz soǵystan keıingi qıyn jyldarda da dúnıege bala ákelip, ósirdik. Al qazir memleket tarapynan barlyq jaǵdaı jasalyp jatyr, – dedi Bıbátish áje. Qysqy Azııa oıyndarynyń eki dúrkin chempıony Marııa Fedorenko jýyqta dúnıege úshem ákelgen eken. О́ńir basshylyǵy baqytty ananyń otbasyna keń páter berýge ýáde berdi. Dýman ANASh, «Egemen Qazaqstan». О́SKEMEN.