Respýblıka kúni qarsańynda Oral qalasynda 52 páterlik turǵyn úı óziniń jańa ıelerin tapty. Tórt qabatty ǵımaratty memlekettik-jekemenshik áriptestik negizinde «Damý Jol Oral» jaýapkershiligi shekteýli seriktestigi salyp shyqty.
Buryn bul jerde turǵan úıdi mamandar ábden tozyǵy jetip, apat jaǵdaıyna keldi dep baǵalaǵan. Sóıtip ony renovasııa, ıaǵnı, jańartý úrdisinde qalpyna keltirýge sheshim qabyldandy. Iаǵnı ǵımarattyń burynǵy bet-beınesi saqtalyp, jańartyldy. Jalpy aýdany 3 476 sharshy metrlik ǵımarat 1,5 jyl ishinde qaıta salyndy.
Jańa páterlerdiń kiltin tapsyrý saltanatyna Oral qalasynyń ákimi Mırjan Satqanov arnaıy keldi. Ol jıylǵan jurtty Respýblıka kúnimen quttyqtap, qos qýanyshy qatar kelgen jańa páter ıelerine izgi tilekterin joldady. Sondaı-aq qurylys naryǵyndaǵy kúrdeli ózgeristerge, baǵa naryǵyndaǵy aýytqýǵa qaramastan qurylysty sapaly júrgizip shyqqany úshin merdiger fırma qurylysshylaryna alǵys aıtty.
Jańa úıdiń 12 páteri buryn osy jerde bolǵan apatty úı turǵyndaryna berildi.
Bıylǵy Respýblıka kúni merekesi aýyl turǵyndaryna da qýanysh ákelýde. Máselen, shalǵaıdaǵy Qaztalov aýdanynyń Jańajol aýyldyq okrýgindegi Ábish, Kókterek aýyldyq okrýgine qarasty Elaman jáne Saraljyn eldi mekenderine kógildir otyn qubyry tartyldy. Aıta keteıik, bul – buryn sovhoz bólimshesi bolǵan kishi eldi mekender.
Batys Qazaqstan
