24 mamyr. Lıssabon. «Eshtadıý da Lýj» stadıony. 60976 kórermen.
Tóreshi: Born Keıpers (Gollandııa).
«Real» (Madrıd) – «Atletıko» (Madrıd) 4:1 (0:1).
«Real»: Iker Kasılıas, Danıel Karvahal, Serhıo Ramos, Rafael Varan, Fabıý Koentraý (Marselo, 59), Lýka Modrıch, Samı Hedıra (Isko, 59), Anhel Dı Marııa, Garet Beıl, Karım Benzema (Alvaro Morata, 79), Krıshtıaný Ronaldý.
«Atletıko»: Tıbo Kýrtýa, Hýanfran, Joao Mıranda, Dıego Godın, Felıpe (Tobı Alderveırenld, 83), Raýl Garsııa (Hose Ernesto Sosa, 66), Tıagý Mendesh, Gabı, Koke, Davıd Vılıa, Dıego Kosta (Adrıan, 9).
Goldar: Dıego Godın (36), Serhıo Ramos (90+3), Garet Beıl (110), Marselo (118), Krıshtıaný Ronaldý (120-penaltı).
Eskertý: Ramos Serhıo (27), Samı Hedıra (45+1), Marselo (118), Rafael Varan (120+3), Krıshtıaný Ronaldý (120+1) – Rýal Garsııa (27), Joao Mıranda (53), Davıd Vılıa (72), Hýanfran (74), Koke (86), Gabı (100), Dıego Godın (120).
Keshe, mamyrdyń 24-i kúni túnde Portýgalııa astanasy – Lıssabon qalasynda ıspan eliniń bas qalasy – Madrıdtiń «Real» jáne «Atletıko» komandalary Chempıondar lıgasy fınalynda kezdesip, oıyn 4:1 esebimen bulardyń aldyńǵysynyń paıdasyna sheshildi. Bul týraly ras.kz habarlady.
Fınaldyq oıynǵa ǵana laıyqty naǵyz fantastıkalyq match boldy bul! Bálkı, ol fýtbol oıyny sapasy turǵysynan qaraǵanda, asa kórnekti bolyp shyqpaǵan da shyǵar. Biraq jurt ony qyzyqtaı otyryp, býyrqanyp atylǵan sezimderdi, kóńil-kúıdiń erekshe bulqynysyn, shıelenisken sıýjetterdi kórdi. Fýtbol, mine, osynysymen de qymbat, osynysymen de qyzyqty!
Serik PIRNAZAR.
Oıynǵa kirispe
Chempıondar lıgasy , álbette, Eýropanyń klýbtyq deńgeıdegi fýtbolynyń shyńy bolyp tabylady. Kári qurlyqta, sirá, onyń shyńyna shyǵýdy armandamaıtyn birde-bir komanda da, jalǵyz-jarym fýtbolshy da joq. Al bıyl ekinshi jyl qatarynan sol asýdy alýǵa bir eldiń eki birdeı ujymy talasa-tarmasa umtyldy. Byltyr ǵana Londondaǵy ataqty «Ýemblı» stadıonynyń tórinde nemistiń eki jamaǵaty – Mıýnhenniń «Bavarııasy» men Dortmýndtyń «Borýssııasy» shaıqasqan bolatyn. Endi sol kepti Ispanııanyń bir qalasynyń – Madrıdtiń eki klýby – «Real» men «Atletıko» kıdi. Bul – atalmysh týrnır tarıhynda bir qalanyń eki komandasy bas báıgeni sarapqa salǵan fınalda birinshi ret toqaılasýy!
Árıne, «Realdyń» qurlyq týrnırindegi tájirıbesi de, ataǵy da qarsylasyna qaraǵanda, anaǵurlym artyq. Sońǵy kezeńderi ol 2000 jyly fınalda ıspannyń taǵy bir komandasy – «Valensııany» 3:0 etip utty. Arada eki jyl ótkende «sarymaılar» nemistiń Leverkýzeniniń «Baıerin» jeńip shyqty. Alaıda, sodan bergi «blankos» fınalda utý mártebesine qaıtadan jete almaı qoıdy. Bir tekti, ıaǵnı óz otandasymen ótken fınalda oınaý tájirıbesi buǵan deıin «Atletıkonyń» da basynan ótti. Ras, ol Eýropa lıgasynda oryn aldy. 2012 jyly atalmysh komanda Bılbaonyń «Atletıgimen» ushyrasyp, 3:0 degen eseppen jeńiske jetken edi.
Shyny kerek, qurlyqtyq jarystardaǵy tabystary boıynsha Madrıdtiń bul eki jasaǵyn bir-birlerimen salystyrý tipti de múmkin emes. Buǵan deıin «Atletıko» Eýropa lıgasynda eki ret bas báıgeni alyp, sonaý 1962 jyly Kýbok ıeleri kýbogyna qol jetkizgen-di. Al Eýropa Chempıondar lıgasynyń fınalyna ol birinshi ret shyǵyp otyr. Komanda Eýropa chempıondary kýbogy úshin shaıqastyń aqtyq synyna 1974 jyly bir ret jetip, onda nemistiń «Bavarııasyna» jol berip qoıǵan edi. О́z kezeginde «Real» alty ret Eýropa chempıondary kýbogyn utyp, keıingi Chempıondar lıgasynda úsh ret bas báıge alyp úlgerdi. Onyń oıynshylary taǵy eki márte ÝEFA Kýbogyn tóbelerine kóterdi.
Oıyn barysy
Kezdesýdiń basynan «Real» dopty tizgindep ustady. Qorǵaýshy Karvahaldan udaıy qoldaý alyp turǵan Beıl oń qaptaldan birneshe ret shúılikti. Bir joly ol Benzemaǵa ádemi dop asyrdy. Ony alǵan fransýz fýtbolshysy ókshesimen dopty buǵan qaıtardy. Biraq qaqpashy Kýrtýa ony jarty joldan qaǵyp ketti. Alǵashynda «Atletıko» óz alańy mańyna kóp kúsh shoǵyrlandardyryp, qorǵanysqa kóshýge májbúr boldy. Qarsylastarynyń joıqyn shabýylyn barynsha basýǵa tyrysqan olar sonymen birge tasqamal qorǵanystyń aıasynda qalyp qoıýǵa da onshalyqty qushtar bola qoımady. Sol sebepti de Dıego Sımeoneniń shákirtteri ózderiniń qarsy shabýyldaryn uıymdastyrýdyń joldaryn udaıy izdestirýmen boldy. Aınalyp kelgende, «matrasshylardyń» qarsy alań jaqqa eń birinshi joryǵy aıyp dop soǵýǵa alyp bardy. Ras, ony shartty túrde qonaqtar sanalǵan atletıkolyqtar muny ózderi úshin tıimdi paıdalana almady. Al alǵashqy onynshy mınýttyń aqyrynda Dıego Sımeone oıynshylar almastyrýǵa májbúr boldy. Ol óziniń tolyq kúshinde oınaı almaǵan Dıego Kostanyń ornyna Adrıandy shyǵardy. Argentınalyq bapker jaraqaty bar shabýylshyny starttyq quramda alańǵa shyǵarýdyń úlken qatelik bolǵanyn osy tusta ǵana ańǵarsa kerek. Bir aptanyń ishinde tize jaraqaty qalpyna kele qoımaıtynyna onyń kózi endi ǵana jetken shyǵar.
Degenmen, «Realdyń» oıyn basyndaǵy qatty qysymy ýaqyt uzaǵan saıyn birtindep bosań tarta berdi. Aqyrynda eki jaq oıynyndaǵy tarazy basy teńeskendeı qalyp tanytty. Osy tusta eki jaq ta kóptegen qatelikterge uryndy. Al gol soǵatyn sátterge eki jaq ta qol jetkize almaı jatty. Matchtaǵy birinshi týra soqqy 14-mınýtta jasaldy. Ony Raýl Garsııa alystan uryp oryndady. Biraq dop qaqpa baǵanynyń ortasyna týralap barǵan joq. Osydan keıin matchtaǵy qarqyn birshama basylyp qaldy. Komandalar qaıtadan alań ústinde ústemdik qurý jolyndaǵy kúresterin jalǵastyra berdi. Osy kezde oıynshylardyń barynsha saqtyq jasap júrgenderi de kórinip turdy.
Eger kezdesýdiń basynda «Realdyń» oń qaptaly meılinshe belsendirek qımyldaǵan bolsa, birinshi taımnyń ekvatory shamasynda oıynnyń negizgi aıqasy qarsy qanatqa aýysyp ketti. Sol jaqpen Koentraý birneshe ret reıd jasap ta kórdi. Bir joly tipti ol qaýipti bolýy yqtımal aıyp dobynyń soǵylýyna da sebep boldy. Standartty soqqyny Modrıch jasady. Biraq onyń shirene urǵan doby zýyldap ushyp baryp, týra Kýrtýanyń qolynan bir-aq tabyldy. Kóp uzamaı «Atletıko» qarsy shabýylǵa qaýyrt kóterilip, Kasılıastyń darbazasy mańyn torýyldap aldy. Onyń oıynshylary tipti bir ret buryshtama dobyn da soqty. Al odan nátıje shyǵara qoımaǵasyn, artynsha óz aıyp alańdary aýmaǵyna qaıta toptasýǵa májbúr boldy. «Blankostyń» jyldam uıymdastyrǵan qarsy shabýylyn olar tek tártip buzý arqyly ǵana toqtata aldy. Bul joly osyǵan baılanysty belgilengen aıyp dobyn soǵýǵa Ronaldý ynta tanytty. Onyń zyńyldaı ushqan ushqyr doby qaqpa sheńberin týralap jetti. Biraq Kýrtýa qatelese qoıǵan joq.
Osydan bastap alań ústindegi oıly oıyn óziniń órnegin joǵalta bastady. Onyń ornyna tirnekti tires pen keskekti kúres birinshi planǵa shyqty. Alaıda, buǵan qaradaı qapa bolýdyń da reti joq edi. Sebebi, mundaı iri aýqymdaǵy týrnırdiń bastan-aıaq fýtbol oıynynyń sabaǵyna kiretin úzdik úlgi qalpynda ótýi múmkin de emes bolatyn. Túpki nátıjesi jeńis bolyp tabylatyn kezdesýlerde kóp jaǵdıda sol maqsatqa jetýdiń basqa da tásilderi qoldanylyp jatady. Bul joly da solaı boldy. Sondaı teketirestiń barysynda yqtımal meımandar Kasılıas qaqpasyna qaraı kezekti márte shabýylǵa shyqty. Onyń «blankos» úshin birden ókinishti bolyp aıaqtalýy da múmkin edi. Osy mezette bir-birlerimen úılesimdi oınaı almaǵan realdyqtar óz qaqpalaryna dop ta jiberip qoıa jazdady. Alaıda, Adrıannyń aıyp alańy syrtynan urǵan doby ortadaǵy oıynshylar shoǵyryna tıip, keri qaıtty. Al korol klýbynyń buǵan jaýap retinde jasaǵan qarsy joryǵy budan da qaýipti kórindi. Aldymen Tıagýdyń salǵyrt berilgen pasyn Beıl jary jolda qaǵyp áketti. Sodan soń qarsylastar tarapynan birde-bir tosqaýyl kórmegen Garet aıyp alańy ishine emin-erkin qoıdy da ketti. Biraq vallılik jigit qaqpaǵa qaraı tez soqqy jasaýdyń ornyna retsiz kidirip qaldy. Osylaı qolaıly sátti jiberip aldy. Arada eki mınýt ótkende, fýtbolda aıtyla beretin «sen soǵa almasań, saǵan soǵady» degen qaǵıdanyń oryndala ketetin mezeti je týa qaldy. «Matrasshylar» kezekti márte buryshtamadan dop jetkizý quqyǵyna ıe boldy. Olar áýeletip ákelgen dopty «Real» oıynshylary dásáýilgide keri qaıtaryp, qaýiptiń betin alastatqandaı bolyp edi, alaıda, «Atletıko» jigitteri ony qaıtadan aıyp alańyna asyryp, Dıego Godınniń baspen qaqpaǵa qaraı urýyna jol ashyp berdi. Osy kezde alǵa qaraı biraz alǵa shyǵyp ketken Kasılıas ornynda turyp qalmaǵanynyń zardabyn tartty. Áýelep ushqan dop Ikerdiń qoly jetpeıtin traektorııa boıynsha ushyp ótip, onyń tý syrtynan qaqpa toryna baryp gúmp etti! Gol! 1:0! Esep osylaı ashyldy.
Qaqpashynyń qateliginen soǵylǵan bul gol Karlo Anchelottıdiń sarbazdaryn, álbette, qatty ashyndyryp jiberdi. Úziliske deıin de áli biraz ýaqyt bar edi. Sondyqtan «Real» oıynshylary osy aralyqta esepti teńestirip úlgerýge baryn saldy. Olar Kýrtýanyń ıeligindegi alańǵa birneshe ret qaýyrt shabýyldar uıymdastyrdy. Biraq bulardyń birde-biri nátıje ápergen joq. Al «Atletıko» óz kezeginde «ekinshi nómirmen» oınaýǵa ońaı kelise salǵan joq, ol da shabýyldy toqtatpaýǵa tyrysty. Sonyń sátinde Sımeone jigitteri buryshtama soǵýǵa da quqyq aldy. Onyń yrǵaǵynda Adrıan baspen uryp, dopty qaqpaǵa dál baǵyttaı almady. Sál keıin «matrasshylar» aıyp dobyn da urdy. Biraq Gabıdyń soqqysy qaqpaǵa týra barmady. Osymen birinshi taım aıaqtaldy.
Ekinshi taımnyń basynan Karlo Anchelottıdiń shákirtteri oıyn tizginin óz qoldaryna alýǵa umtyldy. Alaıda, «Atletıko» jigitteri dopsyz da óte jaqsy oıyn kórsetip, jerlesteriniń joıqyn shabýyldaryna belsendi ujymdyq oıyndy saýatty túrde qarsy qoıa bildi. Soǵan qaramastan, 53-mınýtta Dı Marııa keremet drıblıngtiń arqasynda «matrasshylardyń» qorǵanys qamalyn buzyp ótip, aıyp alańynyń jıegine jetip keldi. Sol kezde Mırandaǵa ony shalyp qulatqannan basqa jol qalmady. Osyǵan oraı belgilengen aıyp dobyn Ronaldý jap-jaqsy oryndady. Biraq óziniń pozısııasyn durys tańdaǵan Kýrtýa qatty soqqyny buryshtamaǵa qaraı aýdaryp úlgerdi. Munyń artynsha berilgen kornerdi «sarymaılar» ońdy paıdalana almady. Dáliregi, álgindegi Ronaldý qaqpaǵa urǵanda qıys ketti. Korol klýbynyń oıynshylary budan keıin de «Atletıko» qaqpasyna osyǵan uqsas qysym jasap kórdi. Áıtkenmen, Dıego Sımeone jaýyngerleri onyń qaýpin óz qaqpalary mańynan alystatyp jiberýge qol jetkizdi. Kóp uzamaı olardyń sapyndaǵy Adrıan qarsy qaqpanyń aıyp alańyna kirip barýdyń oraıyn keltirdi. Bul shabýyl Karvahaldyń shabýylshy aıaǵynyń astynan dopty qaǵyp jiberip, qaptaldan asyra salýymen aıaqtaldy. Munyń sońynan «matrasshylar» eki ret buryshtamadan dop tastady. Biraq olardyń ekeýi de nátıjesiz bitti. Endi oıyn alma-kezek shabýylǵa kóshti. Eki jaq ta óte jyldam da jigerli oınaı bastady. Kezdesýdiń júrip jatqanynan bir saǵat tolýǵa qaraǵan shamada Karlo Anchelottıdiń eki oıynshyny almastyrdy. Ol Fabıý Fabıý Koentraý men Samı Hedıranyń oryndaryna Marselo men Iskonyń shyǵýy arqyly kórinis tapty. Bul Madrıd derbıiniń kúsheıe túsýine kádimgideı úles qosty. Sonyń aıǵaǵyndaı arada az ýaqyt ótkende, Kýrtýa darbazasy aldynda taǵy da qaýipti sát týyndady. Tyń ekeni qımylynan tanylǵan Isko sol qaptaldan kelip, qarsy aıyp alańyna qaraı dopty keremet etip áýeletip jóneltti. Ony ilip áketýge Roanldý men Benzema sál ǵana jetpeı qaldy. Biraq buǵan qarap, «Atletıko» qaqpasyna gol túsetin sát pisip-jetildi dep te aıtýǵa bolmaıdy. Degenmen, bul tusta «Realdyń» shabýyly úziliske deıingi máýrittegiden anaǵurlym qaýipti bolyp jatty. Sondyqtan «matrasshylarǵa» taza qorǵanysqa kóship, shabýyldy qaıtaryp qana turýǵa áste bolmaıtyn edi. Muny Dıego Sımeone oıynshylary da jaqsy túsindi. Osynyń nátıjesinde olar bul jaǵdaıdan tıimdi shyǵýdyń birden-bir ońdy joly qarsy shabýylda jatyr dep sanady. Munyń sońynda Kasılıas qaqpasyna qaıta-qaıta korner belgilengen ýaqyttar da kelip jetti. Al taım ekvatory aýysar shaqty olardan Raýl Garsııanyń ornyna alańǵa Hose Ernesto Sosa shyqty.
Taımnyń ortasynda «Real» qaıta-qaıta qysym jasaı júrip, aqyry oıyn tizginin birjola óz qolyna alyp aldy. Korol klýby osydan bastap pozısııalyq turǵyda kóp shabýyldap, dopty qaqpaǵa qaraı turaqty túrde uryp turýdy ádetke aınaldyrdy. Olardyń ókinishterine oraı, bul soqqylar ylǵı qaqpa baǵany janynan zýyldap ótip ketýmen boldy. Al «matrasshylardyń» oryndaýyndaǵy qarsy shabýyldar barǵan saıyn azaıyp, qýaty da kemı berdi. Sondyqtan olardyń tarapynan qarsylastar joryǵyn tártip buzýshylyq jolymen toqtatý jıileı tústi. Oıynnyń 72-mınýtynda Dı Marııaǵa qarsy kezekti jasalǵan fol «Atletıkonyń» taǵy bir fýtbolshysyna «sary qaǵaz» kórsetilýine sebep boldy. Bul joly ony Hýanfran ózine júktedi. Sol mezette qaıta órisin tapqan shabýyl oraıynda Ronaldý shalqalaı berip, qaqpaǵa qaraı dop atty. Alaıda, onysy úsh baǵannyń ortasyna týralap barmady. Al kezdesýdiń 75-mınýty shamasynda «Real» esepti teńestirýdiń taǵy bir tamasha múmkindigin jiberip aldy. Qarsylastar alańyna doppen júgirip kirgen Beıl qolaıly sátte qolaısyz soqqy jasady. Dop qaqpanyń janynan óte shyqty. Sál keıin Karvahal qaptaldan jetkizgen dop aıyp alańy ishinde Iskoǵa tap ete tústi. Ony alǵan oıynshy aınala berip, qaqpaǵa urmaqshy bola bergen. Sol kez qarsy aldynan Godın shyǵa keldi de, dopty onyń aıaǵy astynan zytyryp jiberdi.
Ekinshi taımnyń sońyna qaraı eki jattyqtyrýshy da óz komandalary sapyndaǵy sońǵy oıynshy almasýshylyqty jasaýǵa sheshim qabyldady. Karlo Anchelottı osy tusta Karım Benzemanyń ornyna alańǵa Alvaro Moratanyń shyǵarsa, Dıego Sımeone sharshaǵany bilinip júrgen Tobı Alderveıreldti Fılıpe Lýıspen aýystydy. Osy kezde eki jasaq aldynda turǵan maqsat pen mindet te bólek edi. Ol «Atletıko» úshin qalaıda osy jeńisti esepti ustap qalýmen áıgilense, «Realdy» sol esepti aldymen teńestirip alýǵa jeteledi. Sondyqtan «blankos» sońǵy mınýttarda, álbette, joıqyn joryqqa shyqty. Onyń Kýrtýa qaqpasy alańyna qaraı jasaǵan úzdiksiz reıdteri barǵan saıyn qaýipti bola bastady. Sol qyzý tartys maıdanynda «Atletıko» oıynshylary qarsylastarynyń esepsiz shabýyldaryn qaıtarý jolynda josyqty-josyqsyz áreket etýmen boldy. Olar kezdesýdiń alǵashqy 90 mınýtynda sol maqsattaryna ja jetti. Alaıda, alańdaǵy arbıtr negizgi mezgilge taǵy 5 mınýt qosty. Fınaldyq matchtyń naǵyz shıelenisi men dramatızmi osy qosymsha ýaqytta kórindi. «Real» bul kezde burynǵysynsha úzdiksiz alǵa umtyla berdi. Sol ólermendik pen ójettik aqyry nátıjege de jetkizdi. Aldymen Modrıch buryshtamadan aıyp alańyna qaraı dop áýeletti. Ol ortada turǵan Ramostyń basyna dóp keldi. Jurttyń bárinen bıik te buryn sekirgen oıynshy dopty Kýrtýa turǵan qaqpanyń torynan bir-aq shyǵardy – 1:1!
Oıynnyń qosymsha ýaqyty jurtshylyq kútkendegideı ssenarıımen órbidi. Endi eseptiń teńesýinen keremet ekpin alǵan Karlo Anchelottıdiń jigitteri erekshe kóńil-kúımen alǵa umtyldy. Al qarsylastarynan aıqyn basymdylyqtaryn kórsetý úshin korol klýbyna bar-joǵy 10 mınýt ýaqyt jetip jatty. Bul kezde «Atletıko» oıynshylaryna qaraǵanda, kúshteri kóbirek saqtalyp qalǵany anyq baıqalǵan «Real» jigitteri áriptesteri alańynan shyqpaı qoıdy. Shabýyldyń sharqy budan bylaı Marselo belsendilik tanytqan sol qanatqa aýysty. Sonyń bir aýanynda ol qarsylastar aıyp alańyna jeldeı esip kirip, dopty jerletip tepti. Sol mezet Mıranda doptyń jolynan tabylyp, qaýiptiń betin qaıtaryp úlgerdi. Budan keıin Marselonyń kezekti shabýyly qaýipti aıyp dobynyń belgilenýine sebep boldy. Aıyp dobyn taǵy da Ronaldý urdy. Soqqy «qabyrǵaǵa» soǵylyp, keri serpildi. Osy ýaqyttary «Real» alańda bir ózi júrgendeı áser qaldyrdy. Tek qosymsha ýaqyttyń birinshi taımy sońynda ǵana «Atletıko» oıynshylary qarsy alańǵa joryq jasaı aldy. Biraq onda da kóp turaqtaı qoıǵan joq. Ras, olardyń sol shapqynshylyqtary taǵy bir buryshtama berilýine jetkizdi. Sonymen bitti. Al «Real» qarsy shabýylǵa shyǵyp, dál sondaı bir kornerge aıaq artty. Munda da buryshtama nátıje bermedi.
Ekinshi qosymsha taımnyń aldyńǵydan ózgeshiligi bolmady. «Real» burynǵysynsha oıynnyń tizginin qolǵa ustap, shabýyldaýyn jalǵastyryp jatty. Al «Atletıko» shanda bir oraıy kele qalatyn qarsy shabýylǵa súıendi. Alań ıeligi óz qoldaryna kóshken Karlo Anchelottı jigitteri qarsy jaqqa shabýyldy barynsha keń qanatpen óristetýge tyrysty. Sondaı kóp shabýyldardyń birinde Modrıch jıyrma metr jerden soqqy jasady – Kýrtýa ornynan tabyldy. Al arada bar-joǵy eki mınýt ótkende «blankos» «matrasshylardy» aqyry «alyp tyndy». Kezdesýdiń 110-mınýtynda Anhel Dı Marııa «Atletıkonyń» alańyna quıyndaı ushyp kirdi de, jaqyn jerden týra Kýrtýaǵa qaraı dop urdy. Al dop alys baǵanǵa qaraı zymyrap bara jatqanda, oǵan Beıl bárinen buryn jetip, basyn tosa qoıdy – 2:1. Álbette, osydan keıin «matrasshylar» esepti qaıta teńestirmek bolyp, shuǵyl alǵa tartty. Olar kúshteri ábden sarqylǵandary kórinip turǵanymen, birneshe ret joryq uıymdastyra aldy. Solardyń birinde Dıego Sımeone sarbazdary buryshtama da berip kórdi. Al ony berý kezinde «Realdyń» qaqpa alańynda naǵyz dúrligis oryn aldy. Onyń oıynshylary Godınniń urǵan dobyn áreń qaıtardy. Osy tusta «Atletıko», sóz joq, esepti teńestirýge óte jaqyn qaldy. Alaıda, 117-mınýtta ol óziniń qaqpasyna úshinshi dopty jiberip alyp, barlyq úmitterinen aırylyp qalǵandaı kúı keshti. Ronaldý qarsylastar alańyna kirgen kezinde dopty ózinen keıingi Marseloǵa syrǵyta saldy. Al aldynda eshqandaı qarsylyq kórmegen fýtbolshy ony alys buryshqa dál túsirdi – 3:1. Munyń ózi de oıynnyń aqyry emes edi. Aqyry qosymsha taımnyń sońynda osy kezdesýdiń birinshi golyn salǵan Dıego Godınniń óz aıyp alańy ishinde Ronaldýdy shalyp qulatýymen aıaqtaldy. Osyǵan baılanysty belgilengen penaltıdi Krıshtanýdyń ózi urdy – 4:1! Osymen tartysqa toly match ta óziniń máresine jetti.
Kezdesý dańqty klýbtyń baǵyn taǵy jandyrýmen birge, mundaı asa jaýapty oıyndarda kezdeısoqtyq degenniń kóp asa bola qoımaıtynyn, onyń qalaı degende de shyn myqtynyń aıbyny asyp, aıdyny ozyp shyǵa kelýine alyp baratynyn kórsetip berdi.
Derekkóz: ras.kz.
Foto: www.dw.de.
