Kezdesý barysynda Qasym-Jomart Toqaev Sharl Mıshelge iltıpat bildire otyryp, Eýropalyq Odaqpen strategııalyq seriktestikti damytý árqashan Qazaqstannyń basty syrtqy saıası basymdyqtarynyń biri bolǵanyn atap ótti.
«Sizdiń saparyńyz Qazaqstan men Eýropalyq Odaq arasyndaǵy seriktestiktiń barlyq salasynda qol jetkizgen mańyzdy jetistikterdi aıtýǵa jaqsy múmkindik beredi. Kelesi jyly mereıli datany – dıplomatııalyq qarym-qatynastardyń 30 jyldyǵyn atap ótemiz. Sizdiń Qazaqstanǵa resmı saparyńyz ózara qarym-qatynasymyzdy jańa deńgeıge kóterýge múddeli ekenimizdi bildiredi», dedi Qasym-Jomart Toqaev.
Memleket basshysy Qazaqstan Eýropalyq Odaqpen Keńeıtilgen seriktestik jáne yntymaqtastyq týraly kelisimge qol qoıǵan Ortalyq Azııadaǵy alǵashqy el ekenin nazarǵa aldy.
Qazaqstan Prezıdentiniń aıtýynsha, joǵary deńgeıdegi turaqty baılanystar Qazaqstan men Eýroodaq arasyndaǵy jan-jaqty dıalogty damytýǵa úles qosady.
О́z kezeginde Eýropalyq Keńes Prezıdenti Sharl Mıshel Qasym-Jomart Toqaevqa qonaqjaılylyǵy úshin alǵys aıtyp, Qazaqstan men EO arasyndaǵy yntymaqtastyqtyń qarqyndy damyp kele jatqanyna kóńili tolatynyn jetkizdi.
«Biz alǵash Brıýsselde kezdestik. Sodan beri tyǵyz baılanys ornatyp, túrli salada jumys istep kelemiz. О́ńirlik deńgeıde birlesken jumys júrgizý mańyzdy. Sizben yntymaqtastyǵymyzdyń ózekti máselelerin, sonyń ishinde klımattyń ózgerýine qatysty máseleni talqylaý maqsatymen kezdeskenime qýanyshtymyn», dedi Sharl Mıshel.
Kezdesýde taraptar energetıka jáne azyq-túlik qaýipsizdigi, «jasyl» ekonomıkany damytý, kólik jáne logıstıka máselelerin jan-jaqty talqylady. Sonymen qatar olar Ortalyq Azııa – Eýropalyq Odaq formatyndaǵy yntymaqtastyqty damytý máseleleri jóninde pikir almasty.
