«Mektep salý – ózekti másele. Elorda turǵyndarynyń jyl saıyn artyp kele jatqany eskerilip, oqý oryndary ornalasatyn jer ýchaskeleriniń de sanyn kóbeıttik. Qazirgi ýaqytta mektep salynatyn 102 jer ýchaskesin belgiledik. Jer ýchaskeleri áleýmettik nysandardyń qajettilikterine oraı qalanyń barlyq aýdanynda ornalasqan. Máselen elorda turǵyndary kóbirek shoǵyrlanǵan jáne qarqyndy damyp kele jatqan Esil aýdanynda mektep salynatyn – 49 ýchaske, Almaty aýdanynda – 29 ýchaske jáne t.b.
Mektep pen ózge de mańyzdy áleýmettik nysandar salý úshin jer ýchaskeleriniń sany jyl saıyn artady. Ár aýdanda (shaǵyn aýdandarda) oqý oryndary bolýy úshin egjeı-tegjeıli josparlaý jobasyna (ETJ) arnaıy baǵyt bekitildi», dep jazdy ákim Instagram paraqshasynda.
Onyń aıtýynsha, «Jaıly mektep» ulttyq jobasy aıasynda 23 asa iri mekteptiń jobasy jasaldy. Bul 23 mektep 2 aýysymda 84 myńnan astam oqýshyny qamtýǵa múmkindik beredi.
- «Jaıly mektep» jobasy aıasynda bilim oshaqtarynyń qurylysyn kelesi jyly bastaımyz. Osylaısha, biz aýqymdy mektepter salýdy jalǵastyramyz. Osyǵan deıin Astanada 6 iri mektep ashtyq, olardyń árqaısysy 4 myń oqýshy ornyna eseptelgen. Qalany aralaý barysynda birqatar mekteptiń qurylys barysymen tanystym. Mysalǵa bul mektepter Uly Dala dańǵylynda, Uly Dala men Saýran dańǵylynyń qıylysynda, 187-kóshede jáne Qarasaı batyr kóshesinde ornalasqan. Atalǵan mektepterdi bıylǵy oqý jylynda ashýdy josparlap otyrmyz, - delingen jazbada.
