Memleket ekonomıkanyń túrli sektorynda bıznes ókilderin tolǵandyratyn máselelerge erekshe kóńil bóledi.
«Problemalardy sheshýdiń jaqsy mysaldary bar, biraq memlekettik organdar tarapynan ázirlengen sheshimderdi iske asyrýdy keshiktirý faktileri de joq emes. Bul máseleler meniń jeke baqylaýymda bolady», dedi Álıhan Smaıylov.
Úkimet basshysy Ulttyq palatanyń normatıvtik quqyqtyq aktilerge júrgiziletin saraptamany kúsheıtý jónindegi usynysyn qoldady. Atap aıtqanda, ázirleýshi memlekettik organdy bıznes múddelerin qozǵaıtyn NQA jobasynyń sońǵy nusqasyn UKP-ǵa qaıta jiberýge, al konsensýs bolmaǵan jaǵdaıda tujyrymdamalyq máseleler boıynsha qaraý jáne pozısııany daıyndaý úshin Premer-Mınıstr deńgeıine shyǵarylatyn kelispeýshilikter hattamasyn jasaýǵa mindetteıtin normalardy engizý bastamasy kóteriledi.
Sondaı-aq memlekettik josparlaý júıesinde qujattardy ázirleýde UKP rólin kúsheıtý kózdelgen. Sonymen qatar Álıhan Smaıylov memlekettik baǵdarlamalardy iske asyrýdy baqylaýdy jaqsartý tetigin ázirleý jónindegi bastamany qoldady.
«Osy jumys sheńberinde Úkimet deńgeıinde bekitiletin árbir sala úshin mańyzdy nysanaly ındıkatorlar – KPI qalyptastyrylady. Osy kórsetkishterge qol jetkizýdi birge baqylaımyz», dedi Premer-Mınıstr.
Budan basqa, Álıhan Smaıylov óńirler deńgeıinde halyqtyń basym bóligi eńbek etetin shaǵyn bızneske baǵyttalǵan osyndaı tásilderdi engizýdi maquldady.
Tóralqa basshysy Raıymbek Batalov Ulttyq palatany transformasııalaý bastalǵany, onyń bıýdjettik baǵdarlamalarǵa jáne oǵan tán emes fýnksııalarǵa táýeldiligi qysqartylyp jatqanyn aıtty. Sondaı-aq bıznes qoǵamdastyqtyń jańa Salyq kodeksin jáne birqatar strategııalyq memlekettik baǵdarlamalardy ázirleýge qosqan úlesi men óńirlerde shaǵyn jáne orta bıznesti damytý boıynsha jańa tásilderi jóninde aqparat berdi.
