«Damý» qorynyń Batys Qazaqstan oblystyq fılıaly 2022 jyldyń 9 aıy ishinde 29 mlrd teńgege jýyq nesıe somasyna sýbsıdııalaý quraly boıynsha 800-ge jýyq jobaǵa qoldaý kórsetip, 3,9 mlrd teńge sýbsıdııa tólegen. Sondaı-aq kásipker nesıe alý úshin bankke júgingen jáne onyń kepili jetkiliksiz bolǵan kezde «Damý» qory onyń kepildigin bere alady. Jyl basynan beri 9 aı ishinde kepildik quraly boıynsha 10,2 mlrd teńge nesıe somasyna 775 jobaǵa qoldaý kórsetilip, kepildik somasy 5,7 mlrd teńgeni qurady.
– Biz memlekettik qyzmetterdi avtomattandyrý jáne sıfrlandyrý boıynsha jumysty 2016 jyly bastadyq. Al 2020 jyly pandemııa kezinde «Damý» qoryna onlaın ótinish berý múmkindigi kásipkerler úshin tıimdi ári yńǵaıly boldy. Endi aýdanda turatyn kásipkerler oblys ortalyǵyna kelip, qujat tapsyryp, kelisimshartqa otyrmaı-aq, elektrondyq sıfrlyq qoltańba arqyly qashyqtan qyzmet ala alady. 2020 jyldan bastap sýbsıdııalar men kepildikterge barlyq ótinim onlaın túrde beriledi, – deıdi «Damý» kásipkerlikti damytý qory» AQ Batys Qazaqstan oblysy boıynsha oblystyq fılıalynyń dırektory Balǵyn Orazova.
Biz «Damý» arqyly sharýasyn damytyp, jetistikterge jetken birneshe kásiporyndy aralap, tynys-tirshiligimen tanystyq.
Aınur Muqanova – uzaq jyl perınataldyq dıagnostıka salasynda qyzmet etken joǵary sanatty sarapshylardyń biri. Uzaq jyl oblystyq perınataldyq ortalyqta, keıin jeke medısınalyq kabınetterde qyzmet etken tájirıbeli maman kópten beri kópsalaly medısınalyq ortalyq ashýdy armandaǵan eken. Ony bul armanyna «Damý» qory jetkizgen.
– Biz oılaǵandaı ortalyqty ashý úshin arnaıy ǵımarat, zamanaýı jabdyq qajet bolatyn. Ony alýǵa qajetti nesıe qarajatyn «Damý» qory arqyly taptyq. Iаǵnı «2021-2025 jyldarǵa arnalǵan kásipkerlikti damytý jónindegi ulttyq joba» baǵdarlamasy boıynsha 155 747 000 teńge kóleminde qarjyny 18,5% paıyzdyq mólsherlememen alsaq, onyń 12,5%-yn memleket sýbsıdııalaıdy. Kepildiń jetispeıtin bóligine «Damý» qorynyń kepildigi berildi, – deıdi Aınur Kenjetaıqyzy.
«Aqjibek» kópsalaly medısınalyq ortalyǵynda áıel densaýlyǵyn bastan-aıaq tekseretin barlyq mamandar men quraldar – ýltradybystyq dıagnostıka, terapevt, pedıatr, genetık, stomatolog, kardıolog, nevropatolog, gastroenterolog, akýsher-gınekolog jáne basqa da saýyqtyrý rásimderi sııaqty joǵary bilikti mamandar qyzmeti kórsetiledi. Onyń ishinde ana qursaǵyna bitken sharanany alǵashqy aptalarda-aq tekserip, aýytqý bar-joǵyn anyqtaı alatyn zamanaýı dıagnostıkalyq apparat elimiz boıynsha sanaýly. Sondyqtan da bul jerge oraldyqtar ǵana emes, Qazaqstannyń ózge óńirlerinen de qyz-kelinshekter arnaıy keledi.
«Damý» qorynan qoldaý alǵan oraldyq kásipkerdiń biri – Aleksandr Fedorov. Ol basqaratyn «ALTAN» jeke kásipkerligi ǵımarattardy qaptaıtyn qurylys materıaldaryn shyǵarady. Turǵyn úıler men kásipkerlik nysandaryna estetıkalyq sán beretin ári dybystan oqshaýlap, jylý únemdeıtin mundaı qaptamalar ınnovasııalyq tehnologııamen jasalyp jatyr. Kompanııa shyǵaratyn taýarlar assortımentinde esik-terezeni bezendiretin sándik elementter de bar. 2021 jyly kásiporyn «Bıznestiń jol kartasy-2025» bıznesti qoldaý men damytýdyń memlekettik baǵdarlamasy sheńberinde VTB-Qazaqstan bankinen 60 mln teńge nesıe alǵan. Bul qarjy óndiristik seh ǵımaratyn satyp alýǵa jumsalǵan. Jylyna 14,5% ósimmen alǵan nesıeniń 8,5%-yn memleket sýbsıdııalaıdy. Jetispeıtin kepildi qamtamasyz etý bóligine «Damý» qorynyń kepildigi berilgen. Biz kásiporynnyń óndiristik sehyn aralap, daıyn ónimder qoımasyn da kórdik.
«Oraldyń Aıbolıt doktory» atanǵan Maksım Stramoýsovty kóp adam jaqsy tanıdy. Batys Qazaqstan agrarlyq-tehnıkalyq ýnıversıtetin bitirgen ol 20 jyldan beri veterınarlyq salada qyzmet etedi. Maksım basqaratyn Zoodoctor veterınarlyq ortalyǵy – Batys Qazaqstan oblysynda haıýanattarǵa tolyq dárigerlik qyzmet kórsetetin jalǵyz klınıka. Munda sertıfıkattalǵan rentgen kabıneti, operasııa ústelderi, reanımasııa bólmesi, haıýanattardy jýyp, tazalap, keptiretin oryn, týý bólmesi, sterıldi bokstary bar veterınarlyq stasıonar, tipti janýarlarǵa arnalǵan qonaqúı de bar.
Maksım Anatolevıch óz isine shyn berilgen jan eken. Itin, mysyǵyn alyp kelgen qala turǵyndaryn qabyldaı júrip, bizge Zoodoctor veterınarlyq ortalyǵyn aralatyp kórsetti. Bul ortalyq úshin de ǵımarat pen jańa jabdyqtar «Bıznestiń jol kartasy-2025» memlekettik baǵdarlamasy aıasynda satyp alynǵan, syıaqy mólsherlemesi 14% bolsa, onyń 8%-yn memleket sýbsıdııalaıdy. Nesıeniń jalpy kólemi 142 mln teńge bolǵan. Kepildiń jetispeıtin bóligin «Damý» qory kóterdi.
– Bizdiń ortalyqqa kún saıyn 120 adamǵa deıin kómek surap keledi. Alys aýyldardan úı janýarlary – jylqy men sıyr, t.b. haıýanattardyń túrli aýrýyn aıtyp, kómek suraıtyndar da bar. Barlyǵyna da shama-sharqymyzsha kómektesemiz. Eń basty qıyndyq – maman tapshylyǵy. Jastar bul salaǵa qyzyqpaıdy. О́ıtkeni jumys óte aýyr. Bul jerge haıýanattarǵa shynaıy mahabbaty bar jandar ǵana turaqtaıdy, – deıdi Maksım.
Mine, «Damý» qory arqyly sharýasyn damytyp, qanatyn keń jaıyp kele jatqan kásipkerler az emes. Qor fılıalynyń qyzmetkerleri jergilikti kásipkerlerge árdaıym kómektesip, memlekettik baǵdarlamalar jaıynda aqyl-keńes berýge daıar.
Batys Qazaqstan oblysy
