Premer-Mınıstr Álıhan Smaıylovtyń tóraǵalyǵymen ótken keńeste bıznestiń problemalyq máselelerin sheshý, sondaı-aq kásipkerlik sýbektilerine qoıylatyn negizsiz talaptardy qaıta qaraý jáne qysqartý jónindegi jumys barysy qaraldy.
«Tezdetý kerek. «Atameken» UKP tarapynan qoldaý tapqan jáne maquldanǵan talaptar boıynsha zańnamany «tazartý» qajet: bul normalardy buıryqtar men qaýlylardan alyp tastaý kerek. Taldaý jumysy aıaqtalǵansha kútpeńizder. Qajetsiz talaptar anyqtaldy ma? Jumysyn toqtatý úshin olardy joıý boıynsha dereý sharalar qabyldaý qajet», dedi Álıhan Smaıylov.
Memlekettik organdar buryn taldanǵan 18 sala, sonyń ishinde aýyl sharýashylyǵy, qurylys, munaı óndirý, kólik jáne saýda salalarynda zańǵa táýeldi aktilerge jáne zańnamalyq aktilerge ózgerister men tolyqtyrýlar engizý rásimin bastady.
Bılik jumysty 2023 jyldyń birinshi toqsanynda aıaqtaımyz dep ýáde berip otyr.
«Bıznes úkimetke problemalyq máseleler aıtady, biz olarǵa óz ustanymymyzdy bildiremiz. Úkimet barlyq áleýmettik-ekonomıkalyq jaǵdaıdy eskere otyryp, bıýdjettiń múmkindikterin eskere otyryp sheshim qabyldaıtyndyqtan, bizde árqashan ortaq pikir bola bermeýi múmkin. Biraq kásipkerlerdiń árqashan bir nársemen kelispeıtinin aıtýǵa múmkindigi bar. Biz dıalogqa ashyqpyz, osy taqyryptardy talqylap, kelisilgen sheshimder qabyldaımyz», dedi Premer-Mınıstr.
