«О́ńirlerdegi mektepterdi damytý kerek. Sondyqtan Oqý aǵartý mınıstrligi ákimdiktermen birlesip, aımaqtardaǵy mektepterdiń qyzmetine taldaý júrgizýi kerek. Sondaı-aq mektepti damytý baǵdarlamasyn ázirleýge qajetti ádisteme daıyndaýǵa tıis», dedi Prezıdent óńir jurtshylyǵymen kezdesý barysynda.
Qasym-Jomart Toqaev óz sózinde jaqynda Bilim berýdi damytýdyń 2022-2026 jyldarǵa arnalǵan tujyrymdamasy bekitiletinin tilge tıek etti.
«Jaqynda bekitiletin tujyrymdamany iske asyrý úshin quzyrly organdar tıisti sharalardy ýaqytyly qabyldaýy kerek. О́ńirge qajetti kásibı kadrlardy daıarlaý isine basa nazar aýdarǵan jón. Memleket jyl saıyn bilim grantynyń sanyn kóbeıtip jatyr. Bıyl joǵary oqý oryndaryna 73 myń grant berildi. Buǵan qosa men batys oblystarynyń túlekteri úshin qosymsha 10 myń grant bólýdi tapsyrdym. Sonyń 6 myńy Mańǵystaýǵa berildi. Biraq bul granttyń tórtten biri ǵana ıgerilgen. Bul – túsiniksiz jaǵdaı. Onyń ústine oblysta bilikti mamandarǵa degen suranys óte joǵary ekeni belgili. Ashyǵyn aıtsaq, joǵary oqý oryndary jáne quzyrly mınıstrlik kásibı baǵdar berý jumystaryn oıdaǵydaı atqarmaı otyr», dedi el Prezıdenti.
Onyń aıtýynsha, túlekterge jáne ata-analarǵa qosymsha grant bólingeni týraly tolyq aqparat jetpeı jatady. Osy rette Memleket basshysy Ǵylym jáne joǵary bilim mınıstrligine arnaıy bilim berý granttary týraly aqparattyq-túsindirý jumystaryn tıisti deńgeıde júrgizýdi tapsyrdy.
«Aımaqta jastardyń grantpen bilim alýy, maman tapshylyǵy, túptep kelgende oblystyń damýy – bári ózara tyǵyz baılanysty másele. Sondyqtan oblys ákimi bul máseleni muqııat qarastyrýy kerek», dep túıindedi Qasym-Jomart Kemeluly.
