Partııa tóraǵasy Ashat Rahımjanov Jalpyulttyq sosıal-demokratııalyq partııa atynan kandıdat Nurlan Áýesbaevtiń saılaýaldy naýqanynda júrgizilip jatqan jumystar jaıly aıtyp berdi.
Kúntizbelik jospar boıynsha úgit-nasıhat kezeńinde 58-den astam is-shara ótkizý kózdelgen. Buǵan saılaýshylarmen, eńbek ujymdarymen, aýyl turǵyndarymen, shaǵyn jáne orta bıznes ókilderimen, shyǵarmashylyq zııaly qaýymmen, stýdenttermen jáne halyqtyń basqa da toptarymen kezdesýler jatady.
«Osy aptalar ishinde saılaýaldy shtab birqatar is-shara ótkizdi, biraz óńirge saparmen bardy. Atap aıtqanda, Nurlan Áýesbaev Qaraǵandy, Aqtóbe, Aqmola, Batys Qazaqstan oblystarynda, Shymkent jáne Almaty qalalarynda kezdesýler ótkizdi. Odan bólek, birqatar aýyldyq eldi mekenderdiń turǵyndarymen júzdesti», dep málimdedi Ashat Rahımjanov.
Aımaqtyq saılaýaldy shtabtar elimiz boıynsha 30-dan astam úgit-nasıhat sharalaryn ótkizdi. Máselen, 5 qarashada JSDP-dan kandıdat Respýblıkalyq saılaýaldy shtab uıymdastyrǵan tyǵyz salynǵan qurylysqa qarsy beıbit mıtıngige qatysty. Is-shara astanadaǵy A.Pýshkın men Sh.Qudaıberdiuly kósheleriniń qıylysynda ornalasqan saıabaq aýmaǵynda ótti. Mıtıngige 50-ge jýyq adam – partııa belsendileri men qala turǵyndary qatysty. Mıtıng qorytyndysy boıynsha rezolıýsııa qabyldandy. Qujatta JSDP turǵyn úı keshenderimen qatar, balabaqsha, mektep, aýrýhana, saıabaq salýdy mindetteıtini atap ótilgen.
Rezolıýsııada sonymen birge ekologııa, qajetti ınfraqurylym qurylysy, salynatyn úılerdiń sapasyn arttyrý máseleleri de kóterildi.
Saılaýshylarmen kezdesý barysynda kandıdat sondaı-aq memlekette saıası reformalardy júrgizý qajettiligin atap ótti. Qazaqstandyqtardyń ómir sapasynyń standarttarynda bekitilgen memlekettiń áleýmettik kepilderin qoldaý ári damytý qajet. Úkimet adal, básekeles bıznestiń damýyna múmkindik bermeı otyrǵan olıgarhtar tobyn emes, halyq múddesin qorǵaýǵa tıis.
Nurlan Áýesbaevtiń saılaýaldy baǵdarlamasynda jemqorlyqqa qarsy kúresti kúsheıtý qajettiligine de erekshe kóńil bólingen. Paraqorlarǵa barynsha qatań jaza taǵaıyndap, merziminen buryn bosatý quqyǵynan aıyrý qajet.
Nurlan Áýesbaevtiń pikirinshe, jemqorlyqty jeńip, memlekettiń basqarý júıesin ózgertken jaǵdaıda ǵana Qazaqstan elimizdiń ekonomıkalyq gúldenýine jaǵdaı jasaı alady.
Qazaqstan Respýblıkasynyń Prezıdenttigine úmitker N.S.Áýesbaevtiń saılaýaldy shtaby ázirledi. Tapsyrys berýshi: N.S.Aýesbaev. Qazaqstan Respýblıkasynyń Prezıdenttigine úmitker N.S.Áýesbaevtiń saılaý qorynyń qarjysynan tólendi.
