«Qazirgi almaǵaıyp kezeńde tranzıt-kólik kommýnıkasııasynyń áleýetin arttyrý jáne onyń múmkindigin barynsha paıdalaný asa mańyzdy. Sebebi, bizdiń memleketterimiz Batys pen Shyǵysty, Soltústik pen Ońtústikti tikeleı baılanystyrady.
Baýyrlas úsh el arqyly ótetin Transkaspıı halyqaralyq kólik dálizi – sonyń jarqyn mysaly. Sondyqtan, biz kólik-logıstıka salasyna erekshe mán beremiz. Sońǵy 15 jylda Qazaqstan osy salany damytýǵa 35 mıllıard dollar qarjy bóldi. Biz kólik baǵdaryn kóbeıtýge jáne logıstıkany ózara yqpaldastyrýǵa múddelimiz. Sol úshin 2025 jylǵa deıin taǵy 20 mıllıard dollar ınvestısııa tartýdy kózdep otyrmyz», dedi Memleket basshysy.
Q.Toqaevtyń aıtýynsha, túrkitildes halyqtardyń qurlyq ishindegi kólik-tranzıt dálizderin damytýy aıryqsha mańyzdy.
«Bul rette, sizderdi osy baǵdardy barynsha paıdalanýǵa shaqyramyn. Tranzıttik jáne eksporttyq múmkindikterimizdi odan ári jetildirgen jón. Ásirese, shekara beketterin jańǵyrtýymyz kerek. Sondaı-aq, qoldanystaǵy temirjol jáne avtokólik baǵyttaryna balama joldar tabý úshin keshendi sharalar qabyldaǵan abzal. Budan bólek, «sıfrlyq kólik júıesin» qalyptastyrý asa mańyzdy. Bul qadam júkterdi rásimdeý sharalaryn ońtaıly etedi. Oǵan qosa, tasymal qujattaryn jyldam almasýǵa jol ashady, halyqaralyq naryqqa shyǵýǵa qosymsha múmkindikter beredi», dedi Prezıdent.
