«Mundaı kezdesýler qıyndyqtardy tıimdi ári jyldam sheshýge, problemalardy nazarda ustaýǵa múmkindik beredi.
Máselen osyǵan deıin jattyqtyrýshylar men sportshylarǵa jeke medısınalyq mekeme bólý týraly problema kóterilgen edi. Sebebi olar kásibı tekserýlerdi ózge pasıenttermen qatar ótip, birge emdeletin. Al bul sportshylardyń daıyndyq sapasy men saýyqtyrý prosesine keri áser etetin. Osy máseleni birlese talqylaǵannan keıin sportshylarǵa arnalǵan arnaıy medısınalyq ortalyq (A-82 kóshesindegi «Nurly Jol» temirjol vokzalynyń janynda) ashyldy.
Sol sııaqty boks, jekpe-jek óneri ortalyqtary, jekpe-jek zaly jáne t.b. ashylyp, «Tolqyn» sport kesheni men «Jastar» saraıynda jóndeý jumysy júrgizildi. «Qazaqstan» sport kesheninde qaıta jóndeý jáne jańǵyrtý jumysy júrip jatyr.
Kóktal-2 jáne О́ndiris eldi mekenderinde dene shynyqtyrý-saýyqtyrý keshenderi ashyldy. Atalmysh oryndarda sporttyń 10 túri boıynsha 1 myńǵa jýyq bala jattyǵyp júr. Taǵy eki eldi mekende dál osyndaı dene shynyqtyrý-saýyqtyrý keshenderiniń qurylysy júrip jatyr. Buqaralyq sportty qarjylandyrýdy 3 esege arttyrdyq», dep jazdy Altaı Kólginov áleýmettik jelidegi paraqshasynda.
Onyń aıtýynsha, 2020-2021 jyldary jattyqtyrýshy-oqytýshylardyń jalaqysy 50%-ǵa, bıyl taǵy 25%-ǵa artqan. Ákim kadr tapshylyǵyn sheshý úshin «Dene shynyqtyrý jáne sport» mamandyǵy boıynsha granttar bóletinin jetkizdi.
«Sol sııaqty jastardy qoldaý boıynsha belsendi jumys júrgizip jatyrmyz. Jastar jelisi boıynsha birneshe turǵyn úı baǵdarlamasy bar. О́tken jyly jeńildetilgen nesıeleý boıynsha arnaıy «Elorda Zhastary» turǵyn úı baǵdarlamasyn engizdik. 2 jyl ishinde 3,4 mlrd teńgege nesıe berildi. О́zge baǵdarlama – jalǵa alý boıynsha 3 jyl ishinde jumys isteıtin jastarǵa 2,5 myńǵa jýyq páter berildi.
Mańyzdy máselelerdiń biri – jumysqa ornalasý. О́tken jyly 6 myń jas jumysqa ornalasty. Jyl sońyna deıin taǵy 6,5 myńnan astam jasty jumysqa ornalastyrýdy josparlap otyrmyz. Sondaı-aq bıznes-ıdeıalardy júzege asyrý úshin granttar beremiz», dep jazylǵan ákimniń jazbasynda.
