13 qarasha – Halyqaralyq zaǵıptar kúnine oraı uıymdastyrylǵan kezdesýge kitap avtory jáne jergilikti zııaly qaýym ókilderi, kitaphana oqyrmandary qatysty.
«Keshtiń maqsaty – Halyqaralyq zaǵıptar kúniniń máni men mańyzy týraly keńinen nasıhattaý jáne kitaphana oqyrmandaryna ólkemizdiń aqyn-jazýshylarynyń shyǵarmashylyǵyn qoljetimdi etý edi. Osyǵan oraı bizdiń kitaphanada «О́lke qalamgerleriniń shyǵarmashylyǵy – Braıl qarpinde» jańa aqparattyq-kitaphanalyq joba qolǵa alynǵan. Mine, búgin osy joba aıasynda jaryq kórgen tuńǵysh kitapty tanystyryp otyrmyz. Asantemir Qarshyǵaulynyń «Shiderli sher» kitaby – bizdiń kitaphana qoryna qosylǵan qazynaly týyndy», dedi kitaphana dırektory Marfýǵa Aıtqalıeva.
Shyraıly sharaǵa qatysqan aqyn, jubantanýshy Úzildik Eleýbaeva, Qazaqstan Jazýshylar odaǵynyń múshesi, «Aqberen» jas aqyndar mektebiniń jetekshisi Talap Taımasuly, aqyn, Qazaqstan Jazýshylar odaǵynyń múshesi Munaıdar Balmolda, kórý qabileti buzylǵan balalarǵa arnalǵan Batys Qazaqstan oblystyq arnaýly mektep-ınternatynyń qazaq tili jáne ádebıet pániniń muǵalimi Aıjan Beketaeva jáne basqalary keshtiń shyraıyn kirgizip, jańa kitap týraly óz oılarymen bólisti.
Eń áserli sát kitap avtory ortaǵa shyqqanda boldy. Asantemir Qarshyǵauly óziniń shyǵarmashylyq joly, jańa kitaptyń mazmuny jaıly aıtyp, oqyrmandardyń suraqtaryna jaýap berdi. Aqynnyń óleńderin óz aýzynan tyńdaǵan jurtshylyq qyzý qol soqty. Kózi kórmeıtin oqyrmandar jańa kitaptan aqynnyń óleńderin saýsaqpen «tanyp» oqyp, jyly áserge bólendi.
– Bul kezdesý ózime de erekshe áser etti. Biz on eki múshemiz saý bola tura, eki aıaǵymyzben qara jerdi nyq basyp júrsek te kóp nárseniń qadirine jete bermeımiz. Bir-birimizdi kóre almaı, kústanalaýǵa ázir turamyz keıde. Al myna jerdegi ortanyń sezimtaldyǵy, bir-birine qurmeti kóp oıǵa qaldyrdy. Bizge qaraǵanda osy jerdegi adamdar áldeqaıda baqyttyraq pa dep oıladym, – deıdi Asantemir.
Kezdesý qonaqtary kitaphana qoryna kelip túsken arnaýly ádebıetterden jasaqtalǵan «BıblıoNews» kitap kórmesin de tamashalady. Kitaphana basshylyǵynyń aıtýynsha, «О́lke qalamgerleriniń shyǵarmashylyǵy – Braıl qarpinde» jobasy aldaǵy ýaqytta da jalǵasyn tappaq.
Batys Qazaqstan oblysy
