Aımaqtar • 17 Qarasha, 2022

«ALA» baǵy Gınnestiń rekordtar kitabyna ene me?

Áli de bolsa bir kezdegi Almatynyń «jasyl qala» degen dańqyn ustap turǵan ádemi baqtar bar. Sońǵy jyldary qalada «Jeltoqsan saıabaǵy», Áıelder alleıasy men Qaraǵaıly orman paıda bolǵanymen, kári aǵashtar men kútimi joq jelekterdiń kóptigi shaharǵa kóleńkesin túsirip turǵanyn da jasyrýǵa bolmaıdy.

Aınash ESALY

Qysqasy, kún tártibinen túspeı kele jatqan osy máselege oraı Memleket basshysy Qasym-Jomart Toqaev ta Almaty saparynda: «Almatyda 2030 jylǵa deıin 2,5 mıllıon aǵash otyrǵyzý josparlanyp otyr. Eń bastysy, abattandyrý jumystary kerekti sýdyń qoljetimdiligi men qala josparyn eskere otyryp, mazmundy ári birkelki júrgizilýi kerek. Almatyda 136 saıabaq bar. Olardyń qataryn kóbeıtip, abattandyrý jumystaryn josparly túrde júrgizý kerek» degenin el estidi.

Osy oraıda Almatynyń damýyna beıjaı qaramaıtyn belsendi adamdar men qala bıliginiń arqasynda Almatynyń halyqaralyq kody – ALA baq túrinde paıda boldy. Endigi jerde alyp ALA baǵy qus qanaty talatyn aspan kóginen ǵana emes, ǵaryshtan da menmundalap kórinip turmaq.

Aıtqandaı, ALA ýaqyt óte jaıqala túsetin kóshettermen jazylǵan eń úlken sóz bolǵandyqtan, Gınnes álemdik rekordtar kitabyna enýden de dámeli. О́ıtkeni áripter beınesindegi mundaı alyp baq buryn-sońdy otyrǵyzylmaǵan kórinedi.

Sonymen 3,36 gektardy alyp jatqan aýmaqqa bıiktigi 2 metrdeı bolatyn qylqan japyraqty arshanyń 2500 túp kósheti otyrǵyzyldy.

Bul baq Almatynyń Alataý aýdanynyń soltústik baǵytyndaǵy sanıtarlyq-qorǵaý aımaǵynda, B.Momyshuly men Móńke kósheleriniń qıylysyna ornalasty. Jańa baq – Almatynyń búgingi halqynyń keleshekke qaldyrǵan sálemdemesi deýge de bolady. Olar jyl ótken saıyn qulashyn kókke jaıyp, qalanyń aýasyna dárý bolatyny sózsiz.

Al endi atalǵan baqtyń avtory – jastaıynan talaı saýapty iske muryndyq bolyp kele jatqan qoǵam qaıratkeri, buǵan deıin de 193 memleketti biriktiretin «Álem sýreti» atty halyqaralyq áleýmettik art-jobasyna aralasqan prodıýser Daýt Shaıhıslamov.

Sonymen 18 qarasha kúni osy baqtyń jaıqalýyna múddeli adamdar qaraǵaıly ormandy túgel otyrǵyzyp, jobany márege jetkizedi.

ALMATY