Soǵysqa barý suranysy qabyl bolyp, ásker qataryna alynǵan Mánshúk urys alańyna attanardan birneshe kún buryn brıgada komandıriniń saıası jumys jónindegi orynbasary mindetin atqarǵan podpolkovnık Saqtaǵan Báıishev Mánshúktiń ótinishine qulaq asyp, ony pýlemetshiler rotasyna jiberý týraly sheshim qabyldaıdy.
Mánshúk Jıenǵalıqyzy 1942 jyldyń qarly qysynda Velıkıe Lýkı qalasyn jaý qolynan azat etýge tikeleı qatysa júrip, urys alańynda sanıtar nusqaýshy bolyp shaıqasqan. Kishkentaı kezinde ákesi Ahmetke eliktep dáriger bolýdy arman etken ol medısına ınstıtýtynyń birinshi kýrsyn támamdap úlgergen bolatyn. Aqyry qan maıdanda jaýyngerlerge kómek kórsetip, «Qaıyrymdy soldat» atanady. Arasynda bos qalǵan pýlemetpen jaý áskerin atqylaı júrip, erekshe kózge túsedi. О́jet qyzdyń bul is-áreketi ony pýlemetshi bolamyn degen armanyna jetkizedi. 1943 jyly komandır Mánshúktiń ótinishin oryndap, aldyńǵy shepke alady. Sóıtip, ol pýlemetshiler batalonyna qosylady. Tipti bólim komandırine deıin kóterilip, serjant ataǵy beriledi.
Batyr qyz 1943 jyldyń 15 qazanynda urys dalasynda erlikpen qaza tapty. Onyń qazasy maıdandastarynyń da qabyrǵasyn qaıystyrdy. Sol kezdegi túrli buqaralyq aqparat quraldary Mánshúk týraly jarysa jazyp, onyń esimin elge uran etti. Qaza bolǵannan alty aı ótken soń Mánshúk Mámetovaǵa Keńes Odaǵynyń Batyry ataǵy berildi. Jalpy halqymyzda jaýǵa erlermen qatar qasqaıyp qarsy turǵan qyzdarymyz az bolmaǵan. Búgingi zamanda da joq emes. Bul sózimizge qyzdarymyzdyń keshegi Jeltoqsan kóterilisi kezindegi erlik qadamdary dálel bola alady.
Qýanáli ALMASBEKULY,
Shelek tarıhı-ólketaný mýzeıiniń qor saqtaýshysy
Almaty oblysy
