Tokıo men Seýl qalalaryndaǵy Qazaqstan elshiligi janynan arnaıy saılaý ýchaskeleri ashyldy. Olar jergilikti ýaqyt boıynsha saǵat 07.00-de, al astana ýaqytymen tańǵy saǵat 04.00-de jumysyn bastady.
Syrtqy ister mınıstrliginiń habarlaýynsha, Tokıoda daýys bergen alǵashqy qazaqstandyq kásipker Syrymbek Taý boldy.
«Saılaýǵa qatysý árbir azamattyń boryshy, memleket aldyndaǵy paryzy dep oılaımyn. Biz óz tańdaýymyzdy jasap, memlekettik iske belsendi aralasýymyz kerek. Meniń oıymsha memleketimizdiń turaqty damýy men irgesiniń berik bolýyna árkim óz úlesin qosý qajet. Mine, sondyqtan da búgin kásipker retinde Tokıoda is-saparmen júrip, óz daýysymdy el bolashaǵy úshin berýdi jón kórdim», dedi S.Taý.
Al Ońtústik Koreıanyń astanasyndaǵy №258 ýchaskege alǵashqy bolyp qazaqstandyq Iýrıı Soı keldi. Ol Seýlde 5 jyldan beri kásipkerlik qyzmetpen aınalysady.
«Men árqashan Qazaqstandaǵy jańalyqtardy belsendi qarap otyramyn. Eldegi oń ózgeristerdi kórip júrmin. Sondyqtan búgin Qazaqstan Respýblıkasy Prezıdentiniń saılaýynda daýys berýge sheshim qabyldadym», dedi kásipker.
Qazaqstandaǵy saılaý ýchaskeleriniń negizgi bóliginde daýys berý jergilikti ýaqyt boıynsha saǵat 07:00-den 20:00-ge deıin ótedi. Sondaı-aq 86 saılaý ýchaskesinde daýys berý jergilikti ýaqyt boıynsha saǵat 06:00-de bastalady.
