Sýretterdi túsirgen Iýrıı Bekker
Qylqalamnan qýanysh tapqan úzdik sheberlerdi bir alańda jınaǵan kórmede sýretshiler ártúrli janrda kompozısııalyq kreatıvti oı-tujyrymdaryn meılinshe aıqyndap, qazirgi zamannyń ózekti máselelerin baıandaý arqyly zamanaýı qazaq kásibı ónerin jańa qyrynan tanytýdy maqsat etken. Qabyrǵadaǵy árbir týyndy kórkemdik shyǵarmashylyqtyń búgingi deńgeıin kórsete otyryp, avtorlyq stıl men taqyryptyq, kompozısııalyq konseptýaldy sheshimderdiń jolyn anyqtaýǵa múmkindik beredi. Beıneleý men qoldanbaly ónerdiń barlyq janryn qamtyǵan ekspozısııa realıstik, abstraksııalyq, avangardtyq, mınımalızmdik, konsentýaldyq mánerdegi óner ıeleriniń kórkemdik ıdeıalaryn keńinen tanytady.
Qazdaı tizilgen kartınalarǵa kóz salsańyz, ár shyǵarmanyń astarynan sýretshiniń ishki álemin kóresiz. Aq pen qaranyń qaıshylyǵy, kúshtiniń álsizge kórsetken óktemdigi, adamzatty tyǵyryqqa tiregen soǵys, jaıqalǵan jasyl dala, qalanyń qaýyrt tirshiligi, áke men ana beınesi, eńbek adamdarynyń mańdaı teri, esepsiz dostyqty tý etken adal jandar, bári-bári osynda...
Qazaqstan Sýretshiler odaǵynyń kezekti HIH sezi qarsańyndaǵy esep berý kórmesine sarapshylar komıtetiniń sheshimi boıynsha: Astana, Qaraǵandy, Pavlodar, Kókshetaý, Atyraý, Aqtaý, Aqtóbe, Oral, О́skemen, Taraz, Shymkent, Almaty qalalarynan, Almaty oblysynan barlyǵy 120 sýretshiniń qoltańbasy iriktelip alynǵan. Kórmedegi 150-ge jýyq keskindeme, grafıka, músin, gobelen, keramıka, kıiz, keste ónerinde bederlengen shyǵarmashylyq týyndylar kóz baýraıdy. О́ner janashyrlary ekspozısııany túpnusqamen qatar onlaın formatta da tamashalaı alady.
– Kórmeniń ereksheligi, Qazaqstannyń árbir óńirinen qatysqan sýretshiler óz belsendilikterin tanytty. Aldyńǵy tolqyn aǵa býynnan bastap izbasar jas sýretshiler ómirlik tájirıbesin, ishki álemin, ózindik tulǵalyq mánerin, kreatıvti tujyrymyn, ózgeshe órnekterin ortaǵa salyp, maǵynaly da mándi týyndylaryn usyndy. Sýretshilerdiń ulttyq tarıhty, mádenıetti, salt-dástúrdi dáripteıtin jáne búgingi tańdaǵy áleýmettik taqyrypta syr shertetin týyndylary oı-sanany san tarapqa jeteleıdi. Sondaı-aq ekspozısııadaǵy árbir shyǵarmanyń kompozısııalyq jáne kollorıttik sheshimderi, ondaǵy dınamıkalyq úndestik pen ózara tutastyq ýaqyt pen keńistik bolmysyn dáripteıdi. Sýretshi – áleminiń qubylysyn astyrtyn málimdeı, kórermenge tirshilik pen qoǵam shyndyǵyn erkin jetkizetin, árbir qozǵalysty sermeı syzyp, ondaǵy tylsym dúnıeniń bolmysyn óner tilimen túsindiretin jyrshy, – deıdi kórme jetekshisi, ónertanýshy Gúlnar Jubanııazova.
Zaman aǵymyna qaraı sýretshi neni bolsa da jańa kózqaraspen berýge umtylady. Kórgeni men túıgenin, ýaqyt pen zamana kelbetin, ishki oı-túısigin kórermenge der kezinde jetkizgisi keledi. Keneptegi qorshaǵan ortanyń tepe-teńdik úılesimi, ańyz ben kóne tirshilik tylsymy, adamdardyń kóńil kúıi sııaqty taqyryptyq kompozısııalar shynaıylyǵymen qundy. Ásirese keshe men búgindi salystyra jyrlaǵan jumystar – adamzat balasy jańa múmkindikterdi ıgergenimen eń izgi qundylyqtardan ajyrap bara jatqanyn aıtqysy keletindeı…
ALMATY
