Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov Shymkent qalasynda bıznes ókilderimen atalǵan máselege oraı jıyn ótkizdi. Keńeske júk tasymaldaýshylar, tarmaq ıeleri jáne kólik prokýratýrasy, kóliktik baqylaý ınspeksııasy, QTJ júk tasymaldarynyń ókilderi qatysty.
Un tartý kásiporyndary jáne basqa da vagonǵa muqtaj kásipkerler elimizdiń júk vagon parki operatory – «Qaztemirtrans» AQ-nyń jumysyna kóńili tolmaıdy. Olardyń aıtýynsha, kásiporyndar ótinimderdi ýaqtyly beredi, alaıda «Qaztemirtrans» AQ strategııalyq mańyzdy ónimderge arnalǵan astyq tasyǵyshtardy usynbaı jatyr.
«Búgingi tańda biz, ońtústiktiń un tartýshylary, zaýyttarymyzdy astyqpen tolyq qamtamasyz ete almaı otyrmyz. «Qaztemirtranstan» astyq tasıtyn kólikter týraly qandaı da bir derek berilmeıdi. Vagondar qansha, nesheýi keledi degen suraqtyń jaýabyn tappaı dal boldyq. Bizdiń kásiporyndardyń jumysy osy vagondarǵa baılanysty. Eldiń soltústiginen ákelinetin astyqtyń keshigýine baılanysty jyljymaly quramdy alý úshin dál sol «Qaztemirtranstan» astyq tasıtyn vagondardy jalǵa alatyn jáne tarıfi qymbatyraq «Astyq trans» jeke kompanııasyna júginýge májbúrmiz. Másele sheshilmese, amal joq, jumysty múldem toqtatyp, qyzmetkerlerdi merzimsiz demalysqa jiberemiz», deıdi un tartý kásiporyndarynyń basshylary.
Kásipkerlerdiń boljamy boıynsha, KTT astyq tasymaldaýshylary qazir eksport baǵytqa qarqyndy jumys isteıdi. О́ıtkeni vagondardy respýblıkaishilik baǵyttan góri syrtta júrgizgen tıimdirek kórinedi.
«Shymkent pen Túrkistan oblysynda búginde 25-ke jýyq dıirmen turaqty jumys istep tur. Olar táýligine 4,5-5 myń tonna astyq óńdeıdi. Biz eldiń jeti óńirin tolyǵymen unmen qamtamasyz etemiz. Iаǵnı 6-7 mln adamdy asyrap otyrmyz. Tek soltústik óńirlerdiń bıdaıyn óńdeımiz. Al astyqty dıirmenge tek temir jolmen ǵana jetkizemiz. Bizdiń turaqty jumys isteýimiz eldiń azyq-túlik qaýipsizdigine tikeleı baılanysty. Nelikten bizdi eldegi astyq tasıtyn jalǵyz kompanııamen jumys isteýge májbúr etedi? Sonda bizge tańdaý joq pa?», dep nalıdy kásipkerler.
Bıznes ókilderiniń málimdeýinshe, «QTJ-Júk tasymaly» basshylyǵymen qandaı da bir mámilege kelý múmkin emes. Birneshe jyldan beri olar júkterdi jedel jetkizýge ýáde berip keledi. Tipti qajet bolǵan jaǵdaıda qatań sharalar qabyldaımyz dep te aıtypty. Alaıda berilgen sert áli kúnge deıin monopolıst tarapynan oryndalmaı otyr. Onyń ústine «QTJ» AQ qurylymdyq bólimsheleriniń áreketi de túsiniksiz. QTJ-dan da, KTT-dan da, eldiń bas tasymaldaýshysynyń ózge de enshiles kásiporyndarynan da mardymdy jaýap ala almaı júrgenderin jetkizdi un tartýshylar.
Keńes qorytyndysynda osy máselege qatysty kásipkerler quqyqtaryn qorǵaý jónindegi ýákil bylaı dedi: «О́kinishke qaraı, bul másele búgin ǵana paıda bolǵan joq. Bul jyldar boıy qordalanyp kelgen ózekti problema bolyp tur. Túptep kelgende, QTJ-nyń júkterdi jetkizý qarqyny 3-4 esege baıaýlap ketkeni ras. Onyń birneshe sebebi bar sekildi. Solardyń bastylaryna toqtalsam, bul lokomotıvtiń bolmaýy jáne tasymaldy durys uıymdastyrmaý saldary. Osy eń negizgi eki másele shuǵyl túrde sheshilýge tıis. Astanaǵa oralǵannan keıin biz birden keńes ótkizemiz, onda QTJ-nyń, Monopolııaǵa qarsy agenttiktiń, Indýstrııa jáne saýda mınıstrliginiń basshylyǵymen aqyldasamyz. Bul ózekti problema bıyldan qalmaı qalaıda óz sheshimin tabýǵa tıis. О́ıtpegen jaǵdaıda Memleket basshysynyń tikeleı ózine shyǵýymyzǵa týra keledi», dedi ol.
ShYMKENT
