Bıyl 11 myń shaqyrymnan astam avtojolǵa qurylys-montajdaý jumystary júrgiziledi.
«Respýblıkalyq jeli boıynsha 4 myń shaqyrymda qurylys jáne rekonstrýksııa jumystary júrgizilip jatyr, sonyń 1,2 myń shaqyrymyn aıaqtaımyz. Kúrdeli jáne ortasha jóndeýmen shamamen 3 myń shaqyrym jol qamtyldy, sonyń 900 shaqyrymyna jýyǵynda jumystar máresine jetti. Jergilikti avtojoldar jelisine toqtalar bolsam, jóndeýdiń barlyq túrimen 4,6 myń shaqyrym jol qamtylǵan, sonyń 2,6 myń shaqyrymy aıaqtalady», dedi Tólegen Abdýllın.
Osylaısha, jyl qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 91%-ǵa jáne jergilikti jeli boıynsha 85% ǵa deıin jetkiziledi.
Avtomobıl joldary komıtetiniń tóraǵasy Tólegen Abdýllın brıfıngte sondaı-aq bıyl uzyndyǵy 72 shaqyrym bolatyn «Podstepnoe – Fedorovka» avtojolynyń eki ýchaskesin rekonstrýksııalaý jumystary bastalǵanyn málimdedi. Qalǵan 2 ýchaskede qarajat tartý esebinen qarjylandyrý máselesi pysyqtalýda.
Budan bólek bıyl Qyzylorda oblysynyń aýmaǵy boıynsha «Qyzylorda-Jezqazǵan» avtojolyn qaıta jańartý bastalǵanyn habarlady. Al Ulytaý oblysynyń aýmaǵyndaǵy qalǵan ýchaskeler boıynsha merdigerlik uıymdy anyqtaý úshin konkýrstyq rásimder júrgizilip jatqanyn aıtty. Sondaı-aq jekelegen ýchaskelerde jobalaý smetalyq qujattamalar ázirleý jumystary aıaqtalýda. Atalǵan jobalar Memleket basshysynyń tapsyrmasy aıasynda júzege asyrylyp jatqanyn aıta ketken jón.
«Áleýetti jobalarǵa toqtala ketsem, jobalaý prosesinde 3 jańa joba bar. Atap aıtqanda, Oral qalasynyń ońtústik-batys aınalma jolymen «Atyraý-Oral», «Jezqazǵan-Qaraǵandy» jáne «Aqtóbe-Ulǵaısyn». Jobalaý jumystaryn 2023 jyly aıaqtaý kózdelip otyr. Budan soń qurylys-montajdaý jumystaryn bastaý josparlanýda», dedi komıtet tóraǵasy.
