Qazir Atyraý-Astrahan avtojolynda jol-qurylys jumystary 4 ýchaskide júrgizilip jatyr. Bul qurylysty iske asyrýǵa 5 asfaltbeton zaýyty, 470-ten astam arnaıy tehnıka jáne shamamen 600-ge jýyq maman tartylyp otyr. Ýchaskeler boıynsha jol qozǵalysy asfaltbeton jabynynyń tómengi qabaty tóselgen boıda ashylyp otyrady. Bıylǵy maýsymda 72 shaqyrymdaı jerge asfalt tóseldi.
Tutastaı alǵanda, qazir qaýipsiz jol júrisi 277 shaqyrymnyń 132 shaqyrym jerine deıin qamtamasyz etilgen. Onyń ishinde Janbaı aýylynan Aqqystaý aýylyna deıin 19,5 shaqyrym, Qurǵaq kópirinen 17-shi razezge deıin 15 shaqyrym, Baıshaqa kópirinen Isataı aýdanynyń shekarasyna deıin 15 shaqyrym, Qurmanǵazy aýdanynyń shekarasynan Atyraý qalasyna qaraı 18 shaqyrym, Tushyqudyq jáne Janbaı kentteriniń ishinde 4 shaqyrym, sonymen qatar Reseı Federasııasynyń shekarasynan (Astrahanǵa) Atyraý qalasyna qaraı 60 shaqyrym jerge deıin sapaly jol qozǵalysy uıymdastyrylǵan.
Sonymen qatar barlyq 14 mal ótkeliniń qurylys jumystary aıaqtaldy.
Atyraý oblysynda tas karerleriniń bolmaýy qurylys jumystarynyń tejelip qalýdaǵy negizgi problemalardyń biri ekeni belgili. Barlyq qıyrshyq tasty temirjol arqyly ákelýge týra keledi. Ýákiletti organdarmen kelissóz júrgizý arqyly qajetti materıaldy tasymaldaýǵa ashyq vagondardy berý máselesi ishinara sheshilgenin aıta ketý kerek. 24 myń ashyq vagon qajet bolyp turǵanyn eskersek, onyń tek jartysy, ıaǵnı 11,5 myń ashyq vagon ǵana usynylypty. Spıkerlerdiń aıtýynsha, qurylys-montaj jumystarynyń barysyna jyl saıynǵy jazǵy maýsymdaǵy bıtým men jaǵarmaı materıaldarynyń tapshylyǵy teris áser etip keledi.
