Aımaqtar • 26 Qarasha, 2022

Qarýly kúshterdiń 2600-den asa sarbazy ant berdi

45 ret kórsetildi

«Ońtústik», «Shyǵys», «Astana» óńirlik qolbasshylyqtarynda, Áskerı-teńiz kúshterinde, sondaı-aq elordanyń desanttyq-shabýyldaý quramasynda ásker qataryn jańa tolyqtyrǵandardyń ant qabyldaý rásimderi ótti. Saltanatty sharada 2600-den astam sarbaz Otanǵa adal bolýǵa ant berdi, dep habarlaıdy Egemen.kz.

Is-sharaǵa áskerı bólimderdiń jeke quramy, jergilikti atqarýshy organdar, qoǵam ókilderi, qarýly kúshter men jergilikti qaqtyǵystarǵa qatysqan ardagerler, jas sarbazdardyń týystary men jaqyndary qatysty.

«Ońtústik» óńirlik qolbasshylyǵynda 1600-den astam sarbaz ant berdi. Tarazda saltanatty shara «Jeńis» qalalyq saıabaǵynda ótti. Ásker qolbasshysy general-maıor Mereke Kúshekbaev sarbazdardy osyndaı eleýli kúnmen quttyqtady.

– Baýyrjan Momyshuly atyndaǵy mehanıkalandyrylǵan quramanyń jaýyngerleri Jeńis saıabaǵynda, batyr eskertkishiniń janynda Otanyna adal bolýǵa ant berýi jaýyngerlik dástúrdiń jalǵasyp kele jatqanyn bildirse kerek. Otan aldyndaǵy qyzmetterińdi abyroımen atqarasyńdar dep senemin, – dedi general-maıor Mereke Kúshekbaev.

Aqtaýdyń áskerı-teńiz bazasynda da osyndaı saltanatty shara teńizshi jaýyngerlerdiń sapqa turýymen bastaldy. Pavlodar jáne Shyǵys Qazaqstan oblystarynan shaqyrylǵan matrostar bir aı ishinde teńizshilerdiń tirshiligin úırenip, kemedegi qyzmet negizderimen jáne teńiz termınologııasymen tanysyp úlgerdi.

– Áskerge Pavlodar oblysynan keldim. Árıne, armııanyń ómir yrǵaǵy múlde bólek, bári kún tártibi jáne erejelerge sáıkes jasalady. Áskerı-teńiz kúshterine kelgenime qýandym.  Teńizshi bolý – jaýapkershiligi mol jáne qyzyqty. Mundaǵy erekshe dástúrlerdi komandırler de tanystyryp jatyr,  – dedi matros Aıaz Masyqbaev.

Kóptegen sarbazdardyń ata-analary men jaqyndary saltanatty ant qabyldaý rásimine qatysýǵa keldi. Keshe ǵana bozbala bop kelgen balalarynyń kelbetinen eseıgenin baıqadyq dep aıtyp jatty.

– Búgin uldarymyz úshin mańyzdy kún – ant berý sátin kórdik. Bul, ásirese, desantshy jaýyngerler úshin úlken jaýapkershilik pen abyroı. Áskerdegi boryshyńdy óteý er azamattar úshin ózine degen senimdilikke tárbıeleıtin tamasha ómir mektebi bolary anyq, – dedi Pavlodardan elordadaǵy desanttyq-shabýyldaý quramasyna shaqyrylǵan Abzal Samattyń anasy Gúljanat Hamıtova.

Komandırler sharaǵa kelgen qonaqtardy sarbazdar qyzmet etetin jaǵdaımen tanystyryp, olardyń áskerı qyzmet tóńiregindegi suraqtaryna jaýap berdi.

Jalpy áskerı daıyndyq kýrsynan keıin áskerı qyzmetshiler áskerı mamandyqtardy úırene bastaıdy. Olarǵa shtattyq qarý-jaraq pen áskerı tehnıka bekitiledi.

Sońǵy jańalyqtar

Tarazda tórt jasar balany toq soqty

Qoǵam • Búgin, 22:51

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar