Fransııa – pleı-offta

Álem chempıonattarynyń tarıhyna kóz júgirter bolsaq, Qatar quramasy jarysty uıymdastyrýshy el retinde toptyq kezeńnen shyǵa almaǵan ekinshi memleket atandy. Alǵashqysy – Ońtústik Afrıka quramasy bolatyn. 2010 jyly OAR-da ótken qurlyq birinshiliginde de jarys qojaıyndary toptyq kezeńnen árige asa almaǵan edi.

Birinshi týrda Ekvadordan 2:0 ese­bimen jeńilgen Qatar ekinshi týrda da Senegal quramasyna jol berdi – 3:1. Osylaısha, eki matchta da soqyr upaı oljalaı almaǵan alań qojaıyndary álem chempıonatynda sátsizdikke ushy­raǵan alǵashqy qurama boldy. Sondaı-aq «A» tobyndaǵy ekinshi matchta Nıderland Ekvadordyń osal tusyn taba almady – 1:1. Dese de ekinshi týrdan keıin «qyzǵaldaqtar» eliniń qu­ra­masy Ekvadormen birge týrnır kestesinde 4 upaımen alǵashqy eki oryndy bólisip tur. Senegaldyń enshi­sinde úsh upaı bar.

Azııa aımaǵynan qatysyp jatqan ózge elderdiń nátıjelerine toqtalar bol­saq, alǵashqy týrda azýly Argentına qura­masyn tize búktirgen Saýd Arabııa quramasy ekinshi týrda Polsha fýtbolshylarymen kezdesip, 2:0 esebimen jol berdi. Bul matchta Petr Zelınskıı men Robert Levandovskıı mergendigimen kózge tústi. Toptaǵy ekinshi oıynda Argentına Meksıkany jeńip, alǵash­qy úsh upaıyna qol jetkizdi. Messı qatarynan ekinshi matchta da mer­gendigimen kózge túskenin aıta keteıik. Ekinshi týr matchtarynan keıin «S» tobynda Polsha 4 upaımen kósh bastady. Úsh upaıy bar Argentına men Saýd Arabııasy ekinshi jáne úshinshi oryndardy bólisip tur. Meksıka bir upaımen kósh sońynda qalyp qoıdy.

«V» tobynda baq synap jatqan Iran fýtbolshylary birinshi týrda Anglııa quramasynan ońbaı jeńilse de (6:2), ekinshi týrda tez es jıyp úlgerdi. Iran bul matchta álem chempıonatyna 1958 jyl­dan keıin alǵash ret qatysyp jatqan Ýels quramasymen kezdesip, «Ahmed bın Álı» stadıonynda ótken tartysty kezdesýdiń sońǵy mınýttarynda jeńisti qarsylastarynan julyp áketti – 2:0. 90-mınýtqa deıin birde-bir goldy tamashalaı almaǵan jankúıerler 90+8 jáne 90+11-mınýttarda eki birdeı tamasha goldyń kýási boldy. Kezdesýdiń 86-mıný­tynda Ýels quramasynyń qaqpashysy Ýeın Hennessı qyzyl qaǵazben jazalanyp, alańnan qýyldy. Bul – bıylǵy álem birinshiliginde fýtbolshylarǵa kórsetilgen alǵashqy qyzyl qaǵaz.

Anglııa men AQSh quramalary ara­syndaǵy ekinshi oıynda eki el fýtbolshylary teń nátıjege razy bolysty – 0:0. Birinshi týrda Iran qaqpasyna alty gol soqqan aǵylshyndar bul match­ta AQSh qaqpasynan sańylaý taba almady. «V» tobyndaǵy ekinshi týr oıyndarynan keıin tórt quramada da kelesi kezeńge shyǵý múmkindigi saqtalyp qaldy. Anglııa týrnır kestesinde 4 upaımen kósh bastap tursa, keıingi oryndarǵa Iran (3 upaı), AQSh (2), Ýels (1) quramalary jaıǵasqan. Bul toptyń úshinshi týr matchtary 29 qara­shaǵa josparlanǵan.

Bir aıta keterligi, Anglııa álem chempıonattary tarıhynda osymen 12 márte qarsylastarymen 0:0 esebimen teń oınady. Al AQSh quramasy alǵash ret teń nátıjesine qol jetkizdi.

Fransııa qatarynan eki týrda da 100 paıyzdyq nátıje kórsetip, 32 quramanyń ishinde birinshi bolyp pleı-off kezeńine joldama aldy. «D» tobynda synǵa túsip jatqan «úsh jolaqty» eldiń fýtbolshylary birinshi týrda Aýstralııany 4:1 esebimen tize búktirgen bolsa, keshe Mbappeniń dýbli arqasynda Danııany san soqtyrdy – 2:1. 61-mınýtta álem chempıonatyna qatysyp jatqan eń qymbat fýtbolshy Mbappe esepti ashqan bolsa, arada jeti mınýt ót­ken­de Danııa fýtbolshysy Krıstensen tarazy basyn teńes­tirgen-di – 1:1. Al match­tyń 86-mınýtynda Grızmannyń pasynan keıin Mbappe Shmeıheldi qapy qaldyryp, komandasyna mańyzdy úsh upaı syılady. «D» kvartetiniń ekinshi jubynda Aýstralııa quramasy Týnısti bir gol aıyrmasymen tize búktirip, álem chempıonatyndaǵy alǵashqy jeńisin toılady – 1:0. Bul topta Fransııa merziminen bu­ryn kelesi kezeńge joldama alyp qoısa (6 upaı), ekinshi joldamaǵa Aýstralııa (3), Tý­nıs (1) jáne Danııa (1) quramalary talasady.

Sondaı-aq birinshi týrda Qatardaǵy álem chempıonatynyń basty favorıtteri sanalǵan Brazılııa, Portýgalııa, Bel­gııa quramalary jeńiske jetti. «Pentakam­peondar» alǵashqy týrda Serbııadan basym tússe (2:0), Ronaldý bastaǵan Portýgalııa Ganany jeńdi – 3:2. 60-mınýtta penaltıden gol soqqan Ronaldý qatarynan besinshi álem chempıonatynda mergendik tanytqan tarıhtaǵy birinshi fýtbolshy atandy. Belgııa Mıshı Bachýaıdyń goly arqasynda chempıonattaǵy alǵashqy úsh upaıyna qol jetkizdi.