eGov Mobile qosymshasyna júginedi

Memleket basshysynyń Joldaýyna sáıkes 2025 jylǵa qaraı memlekettik qyzmetterdiń 100%-y eGov Mobile mobıldi qosymshasynda qoljetimdi bolady. Osy jyldyń sońyna deıin memlekettik qyzmetterdiń 80%-yn «smartfon arqyly kórsetýge» kóshirý josparlanyp otyr. Bıyl eGov Mobile mobıldi qosymshasynyń kómegimen 11 mln-nan astam memlekettik qyzmet kórsetildi.

2022 jyly «UAT» AQ eGov Mobile mo­bıldi qosymshasynda QR-kod arqyly qujattarǵa qol qoıý múmkindigin iske asyrdy. Bul mehanızm Otbasy bankiniń jaldamaly turǵyn úıin sýbsıdııalaýǵa usynylǵan ótinimderge qol qoıý úshin, sondaı-aq Joǵarǵy sottyń jeke kabı­netinde (sud.kz) talap-aryzdar men aryzdarǵa qol qoıýǵa jáne avtorızasııa­dan ótý úshin paıdalanylady.

Sonymen qatar bıyl eGov Mobile qosymshasynda bala týý jáne bir jasqa deıingi bala kútimi boıynsha áleýmettik tólemderdi taǵaıyndaý úshin proaktıvti qyzmet túrin alý mehanızmi ázirlendi. Proaktıvti qyzmettiń yńǵaılylyǵy – barlyq habarlamanyń nómirge SMS arqyly da, mobıldi qosymshadaǵy PUSH arqyly da kelýi. Bul qyzmet halyq arasynda tanymal, bala týý jónindegi proaktıvti qyzmet iske qosylǵan sátten bastap 270 myńnan astam adam ony sátti paıdalandy.

«Bala týǵannan keıin bir táýlik ishinde aqparattyq júıe medısınalyq mekemeden habarlama alyp, balanyń ata-anasyna eGov Mobile-ǵa pýsh-habarlama nemese 1414 telefon nómirine SMS-habarlama jiberedi. Onda qyzmetti alý úshin silteme kórsetiledi, sol siltemege ótý arqyly qyzmet túrin alýǵa bolady. EGov Mobile siltemesine ótip, balanyń tegin, atyn, ákesiniń atyn toltyrý qajet, bir jasqa deıingi bala kútimi boıynsha áleýmettik tólemdi alý úshin banktik shottyń nómirin kórsetip, qyzmet túrin alýǵa qol qoıý kerek. Ata-analar qujattardy resimdeýge ýaqyt ketirmeı, balasyna kóbirek ýaqyt bóle alady», dedi «Ulttyq aqparattyq tehnologııalar» AQ basqarma tóraǵasy Rostıslav Konıashkın.

Sondaı-aq osy jyldyń jeltoqsan aıynda eGov Mobile-de «Sıfrlyq máli­metter» jańa bólimin iske qosý josparlanyp otyr. Servıs málimettermen, anyqtamalarmen almasýdyń yń­ǵaı­ly­lyǵyn arttyrý maqsatynda ázir­lenetin bolady. Máselen, paıdalanýshy sıfrlyq qujattar paketin qoldana alady, al jumys berýshi qyzmetkerdiń málimetteri men málimetteriniń jıyn­tyǵyn sıfrlyq nusqada surata alady.

«Jaqyn arada «anyqtama berýdiń» jańa tásilin qoldanýdy josparlap otyrmyz. Bul – ómirlik jaǵdaılar boıynsha sıfrlyq málimetterdi «bólisý» formatyna kóshý. Mysaly, jumysqa ornalasý jaǵdaıynda azamat qosymshada biz jınap bergen qujattar paketin paıdalana alady. Sonymen qatar ol qujattaryn tikeleı eGov Mobile-da bólisý arqyly jumys berýshige jibere alady», dep atap ótti «Ulttyq aqparattyq tehnologııalar» AQ basqarma tóraǵasy Rostıslav Konıashkın.

EGov Mobile mobıldi qosym­sha­synda 641 memlekettik qyzmet qol­jetimdi, onyń ishinde 167-si eGov.kz por­talyndaǵy qyzmet pen servıs, 474-si qyzmet e-license portalynda jeke tul­ǵalarǵa arnalǵan kishi túrleri. Qosym­shanyń kómegimen aı saıyn  1,2 mln-ǵa jýyq memlekettik qyzmet kórsetiledi.

EGov mobile mobıldi qosym­shasy­nyń «Sıfrlyq qujattar» ser­vısinde 20 qujat bar (jeke kýálik, Qazaqstan azamatynyń pasporty, júr­gizýshi kýáligi, vaksınalaý pasporty, PTR test jáne týý týraly kýálik jáne t.b.). Iske qosylǵan sátten bastap tek «Sıfrlyq qujattar» servısi 12 mln ret paıdalanyldy. Sıfrlyq qujattardy talap etý orny boıynsha usynýǵa bolady. Sondaı-aq prezıdent saılaýyndaǵy saılaý ýchaskelerinde daýys berý kezinde sıfrlyq kýálikti paıdalanýǵa bolady.