Kandıdattardy usyný 29 qarashada bastalyp, 14 jeltoqsanda jergilikti ýaqyt boıynsha saǵat 18:00-de aıaqtalady. Naýqan 16 kúnge sozylady.
Úmitkerlerdi tirkeý 26 kúnge, ıaǵnı 29 qarasha men 24 jeltoqsan aralyǵynda saǵat 18:00-ge deıin jalǵasady.
Saılaý naýqany 24 jeltoqsan men 13 qańtar aralyǵynda saǵat 00:00-ge deıin jalǵasady.
13 qańtar - tynyshtyq kúni bolyp belgilendi. 14 qańtar daýys berý kúni. 20 qańtarǵa deıin OSK saılaý nátıjelerin jarııalaıdy.
«Senat depýtattyǵyna kandıdattardy usyný eki jolmen júzege asyrylady. Birinshisi oblystyq, respýblıkalyq mańyzy bar qalalardyń jáne astananyń, aýdandyq máslıhattardyń sessııalarynda saıası partııalar jáne ózge de qoǵamdyq birlestikter máslıhattardyń ókilderi arqyly Parlament Senatynyń depýtattyǵyna kandıdatýralar usynady. Bul rette birneshe máslıhattan bir kandıdat usynylýy múmkin;
Ekinshi joly kandıdat ózin-ózi usynady.
Tańdaýshylardyń qoldaýy qol jınaýmen kýálandyrylady, sondaı-aq árbir tańdaýshy Senat depýtattyǵyna bir ǵana kandıdatty qoldap óz qolyn qoıýǵa quqyly», dedi OSK múshesi Konstantın Petrov.
Kandıdat tirkelgennen keıin qoıylǵan qol sot sheshimi negizinde ǵana qaıtaryp alynady. Tańdaýshylardyń tizimderine oblystyń, respýblıkalyq mańyzy bar qalanyń aýmaǵynda ornalasqan máslıhattardyń barlyq depýtattary engiziledi.
Senat depýtattyǵyna kandıdattardy tirkeý mynadaı qujattardy qajet etedi:
Eger kandıdatty máslıhat usynsa, depýtattyqqa kandıdatty usyný týraly máslıhattyń sheshimi;
Kandıdatty máslıhat usynsa, depýtattyqqa kandıdat retinde qatysýǵa kelisimi týraly ótinish;
Azamattyń ózin-ózi usynǵan jaǵdaıda depýtattyqqa kandıdat retinde qatysý nıeti týraly ótinishi;
Kandıdattyń ómirbaıandyq derekteri;
Saılaýshylardyń kandıdatty qoldaǵan qoldaryn tekserý qorytyndylary týraly aýmaqtyq saılaý komıssııalarynyń hattamalary;
Kandıdattyń jáne onyń jubaıynyń nemese jubaıynyń tabysy men múlki týraly deklarasııany usynǵany týraly memlekettik kiris organynyń anyqtamalary;
Kandıdattyń saılaý jarnasyn tólegenin kýálandyratyn qujattar. Búginde ol 900 myń teńge.
Eske sala keteıik, Memleket basshysy Qasym-Jomart Toqaevtyń sheshimimen Parlament Senaty depýtattarynyń saılaýy 2023 jyldyń 14 qańtarynda ótedi.
