Belgııanyń altyn dáýiri aıaqtaldy ma?

F tobynyń ekinshi týr aıasyndaǵy Belgııa men Marokko arasyndaǵy matchta álem chempıonatynyń taǵy bir sensasııasy tirkeldi. Birinshi týrda 2018 jylǵy álem birinshiliginiń kúmis júldegeri Horvatııamen tere­zesi teń dárejede óner kórsetken Marokko ekinshi týrda bıylǵy birinshiliktiń negizgi favorıtteriniń biri bolǵan Belgııany eki dop aıyrmasymen súrindirdi. Dohadaǵy Ál-Týmama stadıonynda ótken kezdesýde 49 jastaǵy ıspanııalyq maman Roberto Martınes jetekshilik etetin Belgııa quramasy qarsylastaryna qaraǵanda áldeqaıda belsendi bolǵanymen, birde-bir gol soǵa almady. Kezdesýdiń nebári besinshi mınýtynda Mıshı Bachýaı (Belgııa) esepti ashatyn tamasha sátti múlt jiberip aldy. Qaqpashymen betpe-bet shyqqan shabýylshy dopty qaqpanyń tómengi sol jaq buryshyna qaraı tepken edi. Alaıda Marokko qaqpashysy Mýnır tamasha seıvimen jankúıerlerdiń qoshemetine bólendi. Bi­rinshi taımnyń sońyna deıin belgııalyqtar qar­qynyn bir sátke de báseńdetpeı, qarsylastary qaqpasyn torýyldaýmen boldy. Al Afrıka qurlyǵynyń ókilderi tek qarymta shabýylǵa ıek artty. Sondaı sátterdiń birinde Hakım Zıesh (Marokko) Kýrtýa qor­ǵaǵan qaqpadan sańylaý tapqan edi. Biraq VAR kómegine júgingen tó­reshi Zıeshtiń oıynnan tys qal­ǵa­nyn anyqtap, goldy eseptemeı qoıdy.

Degenmen, ekinshi taımda Ma­rokko fýtbolshylary oıyndy óz baqylaýlaryna alyp, dopqa kóbirek ıelik ete bastady. Kezdesýdiń 73-mınýtynda Ábdelhamıd Sabırı aıyp dobyn sátti oryndap, komandasyn esepte alǵa shyǵardy. Roberto Martınes tarazy basyn teńestirý úshin táýekelge baryp, alańǵa qor­ǵaýshylardyń ornyna shabýylshylardy shyǵardy. Biraq bul ózgerister de Belgııany jeńilisten qutqaryp qala almady. Ekinshi taımǵa tóreshi qosqan qosymsha mınýttarda Zakarııa Ábýhlıal qaq­pany dál kózdep, esepti 2:0-ge jetkizdi. Osylaısha, bir jeńis, bir teń nátıjemen Marokko quramasy tórt upaımen óz tobynda ekinshi orynǵa kóterilip aldy. Osydan tórt jyl buryn Reseı jerinde ótkizilgen álem birinshiliginde Marokko toptyq kezeńnen óte almaǵan bolatyn. Al Belgııa quramasynyń qola júldeger atanǵany barshaǵa málim.

Bul toptaǵy ekinshi matchta Horvatııa fýtbolshylary kambek jasap, Kanadany 4:1 esebimen tas-talqan etti. Matchty «úıeńki japyraqtar» eliniń ókilderi sátti bastaǵanymen, kezdesý sońyna deıin eseptegi basymdyǵyn saqtap qala almady. Kezdesýdiń ekinshi mınýtynda Kanada quramasynyń oıynshysy Alfonso Devıs esep ashqanymen (bul bıylǵy álem chempıonatynda eń jyldam soǵylǵan jalǵyz gol bolyp tur), horvatııalyqtar toqsanynshy mınýt túgesilgenge deıin Kanada qaqpasyna tórt gol engizdi. Birinshi taımnyń 36 jáne ekinshi taımnyń 76-mınýtynda Andreı Kramarıch eki ret mergendigimen kózge túsip, dýbldiń avtory atansa, Marko Lıvaııa men Lovro Maıer óz attaryn bir-bir márte tabloǵa jazdyrdy.

Horvatııa quramasy bul je­ńisinen keıin pleı-offqa shyǵý múmkindigin saqtap qaldy. Al 1986 jylǵy álem chempıonatynan keıin alǵash ret mýndıalǵa kelgen Kanada fýtbolshylary úshinshi týrdan keıin birinshiliktegi óz mıssııasyn aıaqtap, elderine qaıtady.

Birinshi týrda «nemis máshınesin» jarǵa jyqqan Japonııa jigitteriniń bul týrda Kosta-Rıka quramasyn jeńýge shamalary jetpedi – 1:0. Kúnshyǵys eliniń ókilderi bar kúshin Germanııamen ótken oıynda sarqyp qoıdy ma eken, áıteýir bul matchta kósilip shaba almady. Dopqa ıelik etý boıynsha Japonııa quramasy qarsylastaryna qaraǵanda sál alda bolǵanymen, múmkindikti tıimdi paıdalaný jaǵynan Ońtústik Amerıka ókilinen qalyp qoıdy. Kezdesýdiń 81-mınýtynda Maııa Iosıdanyń bir ǵana bolmashy qateligin Keısher Fýller tıimdi paıdalanyp, gol soǵyp ketti. Sıýıtı Gonda dopty qaıtarýǵa tyrysqanymen, tym kesh qımyldap qoıdy.

Al kópshilik jankúıer taǵat­syzdana kútken Ispanııa – Ger­ma­nııa matchynda jeńimpaz koman­da anyqtalmady – 1:1. Álem birinshiligindegi eń úzdik qurama­lardyń kezdesýinde nebári eki-aq gol soǵylǵanymen, match óte tartysty ótti. Ásirese bul kezdesýde nemisterge úsh upaı oljalaý qatty mańyzdy boldy. Sebebi birinshi týrda Japonııadan jeńilgen Germanııa quramasy bul oıynda da úsh upaıdan qaǵylar bolsa, onda qatarynan ekinshi álem chempıonatynda toptan shyǵa almaı, jankúıerleri aldynda masqara bolar edi. Abyroı bolǵanda 2014 jylǵy álem chempıondary toptaǵy ekinshi matchta bir upaı oljalap, kelesi kezeńge shyǵý múmkindigin saqtap qaldy.