Bul týraly «Habar24» telearnasy aqparat taratty.
Bir kún buryn datchıkterden shyqqan aqaýǵa baılanysty №15 qazandyq sónip qalǵan. Mamandar qurylǵyny 1,5 saǵattan keıin qaıta iske qosqan. Biraq áli de jeli sýynyń aınalýynda qıyndyqtar baıqalady. Sýyqtyń saldarynan sý myń tonnaǵa artqan. Bul qala turǵyndarynyń batareıalaryndaǵy temperatýranyń tómendeýine áser etken, olar áleýmettik jelilerde shaǵymdanyp jatyr.
Aıta keteıik, Shyǵys Qazaqstan oblysynda keıingi birneshe kúnde aıaz kúsheıgen. Al О́skemenniń jylý elektr ortalyqtary aıazǵa shydamaıtyn kórinedi.
Qazir stansadaǵy jóndeý brıgadalarynyń sany kóbeıgen. Jeti qazandyq pen alty qubyr agregaty jumys istep tur.
Esterińizge salsaq, bul elimizdegi jylytý maýsymy bastalǵaly oryn alyp jatqan alǵashqy jaǵdaı emes. Buǵan deıin osy jyldyń 20 naýryzynda Petropavldaǵy jylý-elektr ortalyǵynyń tútin murjasy jartylaı opyrylyp qulaǵan edi. Saldarynan jumysshy áıel mert bolǵan.
5 qarashada «Rıdder JEO» AQ-da kúl shyǵarý júıesindegi sorǵy isten shyqty, nátıjesinde № 1 qazandyq agregatynyń qosalqy jabdyǵy apatty túrde sóndirildi. Salqyndatqyshtyń temperatýrasy josparlanǵan +70 gradýstan +39 gradýsqa deıin tómendegen edi. Saldarynan qalanyń 22 myńnan astam abonenti jylýsyz qalyp, Rıdderde tótenshe jaǵdaı jarııalanǵan bolatyn.
24 qarasha kúni Arqalyq qalasyndaǵy jylý elektr ortalyǵynda apat boldy.
Aradan birneshe kún ótkende, 27 qarasha kúni Ekibastuz qalasynyń jylý toraptarynda úlken apat boldy. Shahar ishindegi jylý jelilerindegi zaqymdanýdan ystyq sý tolassyz ysyrap bolyp, «Ekibastuzjylýenergo» JShS-daǵy 4 birdeı qazandyq toqtap qalǵan edi.
