Ádette «apat aıtyp kelmeıdi», biraq Ekibastuzdaǵy jaǵdaı ózgeshe.
Eske sala ketsek, 27 qarashaǵa qaraǵan túni jergilikti JEO-nyń ekran qubyrlarynda apat bolyp, №11 pesh agregaty isten shyqqan, sonyń saldarynan taǵy úsh agregat istemeı qalǵan. Nátıjesinde, qalada 17 kópqabaty úı, 5 áleýmettik nysan, 21 zańdy tulǵalar nysany jylýdan ajyratyldy. Jylýsyz qalǵan qala turǵyndary baspanalary sýyp ketkenine shaǵymdanyp, úıde qalyń kıimmen júrýge májbúr ekenderin aıtty.
Kompanııa JEO jumysyn tez qalpyna keltirýge ýáde berdi. Al oblys ákimi Ábilqaıyr Sqaqov Ekibastuzdyń jylý jelisinde birqatar aqaý anyqtalǵanyn aıtyp, qalada iri apat bolǵanyn rastady.
Belgili bolǵandaı, qala turǵyndary bul másele boıynsha jazda da dabyl qaqqan. Buǵan oblys ákiminiń Instagram paraqshasynda jarııalaǵan jazba astyndaǵy pikirler dálel bola alady.
Budan bólek, Ekibastuzda tótenshe jaǵdaı oryn alatynyn aldyn ala boljaǵan qala turǵyny jaz aıynda bılikke júgingen kórinedi.
«Ekibastuzǵa memlekettik komıssııany jiberip, JEO-da bolý múmkin aqaýlardy zerttep, bólingen sýbsıdııalardyń qaıda ketkenin anyqtap, qajetti jóndeý jumystaryn júrgizýdi suraımyn. JEO-nyń tozyǵy shyqqan jabdyqtary aýystyrylmasa, qala kúz ben qys aılarynda jylýsyz qalýy múmkin», delingen jelide taraǵan beınejazbada.
Osy oraıda, Energetıka mınıstrligi aldynǵy boljamdarǵa qatysty túsinikteme berdi.
«Buǵan deıin Ekibastuz qalasy turǵyndarynyń JEO-da júrgizilip jatqan jóndeý jumystarynyń barysy týraly shaǵymdary boıynsha arnaıy komıssııa qurylǵan. Oǵan mınıstrlikke qarasty Atomdyq jáne energetıkalyq qadaǵalaý men baqylaý komıtetiniń jáne ákimdiktiń ókilderi kirdi», delingen habarlamada.
Vedomstvo málim etkendeı, 2022 jyldyń 9-10 tamyzy aralyǵynda atalǵan komıssııa Ekibastuzdaǵy JEO-ǵa barǵan. Sapar barysynda negizgi jabdyqtyń jóndeý jumystary men tómen teris temperatýralar kezeńinde júktemeni kóterý daıyndyǵy tekserildi.
«Stansııany aralaý kezinde JEO basshylyǵyna jóndeý jumystaryn jedeldetý tapsyrylǵan. Jalpy, elektr stansııasynda 5 energetıkalyq jáne 5 sý jylytý qazandyǵy, sondaı-aq 1 bý týrbınasy ornatylǵan. Ol kezde komıssııa jylý qubyrlarynyń tozý deńgeıi 70%-dan asqanyn anyqtaǵan. Jylý qubyrlarynyń jalpy uzyndyǵy 342 km., jyl saıyn shamamen 3-4 km. jylý jelileri aýystyrylady», dep qosty mınıstrlik ókilderi.
Qazirgi ýaqytta Ekibastuz turǵyndarynyń ómirin qalpyna keltirý maqsatynda birqatar is-sharalar kesheni qolǵa alyndy. Tótenshe jaǵdaı boıynsha qurylǵan arnaıy shtabtyń otyrysy ótip, jylý jelilerindegi úsh aqaýdyń bireýi joıylǵany habarlandy. Dese de, qaladaǵy 149 kópqabatty úı áli de jylýǵa qosylmaǵan.
Eske sala ketsek, uqsas jaǵdaı Shyǵys Qazaqstan oblysynyń Rıdder qalasynda da oryn alǵan edi. 2022 jyldyń 5 qarashasynda jergilikti JEO-da kúl shyǵarý júıesiniń sorǵysy isten shyǵyp, 1 qazandyq agregatynyń qosalqy jabdyǵy apatty jaǵdaıda toqtatyldy. 9 qarashada qaıta iske qosylǵan №6 qazandyq túnde taǵy isten shyǵyp, rıdderlikterdi jylýsyz qaldyrǵan.
«Qystyń qamyn jaz oıla» demekshi, kezinde sheshimin tappaǵan másele búginde myńdaǵan adamdy qolaısyz jaǵdaıǵa qaldyrǵany qynjyltady...
