«Parkınson syrqaty mazalaıtyn 52 jastaǵy Astana turǵynyn dárigerler qımyl-qozǵalys fýnksııalarynyń buzylysynan qutqardy. Naýqasqa «oń jaq stereotaktıkalyq talamotomııa» otasy jasaldy. Basqasha aıtqanda, naýqas bas súıegi arqyly mıdyń ortasyna tereń enip, sýbtalamıkalyq ıadroǵa tok ótetin kishkentaı elektrodtar engizildi. Qurylǵy aýrýdan zardap shekken mı jasýshalarynyń jumysyn tereń yntalandyrady. Impýlstar mıdyń zaqymdalǵan bólikterine tikeleı enip, olardyń qyzmetin tezdetedi. Osylaısha, Parkınson aýrýynyń belgilerin jeńildetýge múmkindik beredi jáne onyń aǵymyn baıaýlatady. Ota kvota boıynsha, MÁMS aıasynda jasaldy», dep jazylǵan habarlamada.
Ulttyq neırohırýrgııa ortalyǵyna Astana qalasynyń 52 jastaǵy turǵyny medısınalyq kómekke júgindi. Naýqastyń aıtýynsha, ol 2016 jyldan beri Parkınson aýrýymen aýyryp keledi. Osy ýaqyt ishinde er adam únemi Neırohırýrgııa ortalyǵynyń mamandarynan keńes alyp turǵan. Tamyrly jáne fýnksıonaldy neırohırýrgııa bólimi mamandarynyń baqylaýymen uzaq ýaqyt boıy dári-dármekter arqyly em (túzetý terapııasyn) aldy. Biraq naýqastyń jaǵdaıy jaqsarmady, qımyl-qozǵalys fýnksııalary buzyla bastady, qoldary múldem «tyńdamaıtyn» boldy. Eki qoly qatty dirildeıtini sonshalyq, kúndelikti ómirinde kedergi keltirdi, bulshyq etteri ıkemge kelmeı, denesi siresip, qataıyp ketken. Hırýrgııalyq emniń oń áseri men qaýipti jaqtaryn tarazylaı kele, er adam ota jasatýǵa sheshim qabyldaǵan.
«Keıingi kezderi osy aýrýǵa baılanysty kompıýterde jumys isteı almadym, bar zeıinimdi jumysqa aýdara almadym. Kún saıyn osy jaǵdaı meni tuıyqqa tireı bastady, sonymen qatar toqtaýsyz dirilden uıqym buzyldy. Otadan keıin ózimdi áldeqaıda jaqsy sezinemin. Diril endi mazalamaıdy. Soǵan óte qýanyshtymyn. Oń qolym da, sol qolym da tolyǵymen qalpyna keldi. Buǵan deıin sol qolym yrqyma múldem baǵynbaǵan kezde, dirildiń qatty bolǵany sonshalyq, ol oń qolyma da beriletin edi. Otadan keıin bári keremet», dedi naýqas.
Naýqasqa ota jasaǵan Tamyrly jáne fýnksıonaldy neırohırýrgııa bólimshesiniń neırohırýrg-dárigeri Shyńǵys Saǵadatuly Nurımanov otanyń mánisin egjeı-tegjeıli baıandap berdi. «Ota kvota boıynsha, MÁMS aıasynda júrgizildi. Biz naýqasqa «oń jaq stereotaktıkalyq talamotomııa» otasyn jasadyq. Basqasha aıtqanda, naýqas bas súıegi arqyly mıdyń ortasyna tereń enip, sýbtalamıkalyq ıadroǵa tok ótetin kishkentaı elektrodtar engizildi. Qurylǵy aýrýdan zardap shekken mı jasýshalarynyń jumysyn tereń yntalandyrady. Impýlstar mıdyń zaqymdalǵan bólikterine tikeleı enip, olardyń qyzmetin tezdetedi. Osylaısha, Parkınson aýrýynyń belgilerin jeńildetýge múmkindik beredi jáne onyń aǵymyn baıaýlatady», dep túsindirdi neırohırýrg-dáriger Shyńǵys Saǵadatuly.
Alaıda, mundaı ota jasaý úshin naqty kórsetimder jáne qarsy kórsetimder bar. Sonymen qatar, asqynǵan aýrýy bar jáne este saqtaý qabileti nashar naýqastarǵa mundaı ımplantty ornyqtyrý nátıjeli bola qoımaıdy.
