Sýretterdi túsirgen Erlan OMAR
Elordadaǵy «Qazposhtanyń» ortalyq bólimshesine arnaıy kelgen mınıstrler gazet-jýrnaldarǵa jazylýshylardyń kórsetkishimen tanysyp, bólimshe mýzeıin tamashalady.
«Baspasózge jazylý naýqanyna qoldaý bildirý maqsatynda keldik. Bizge qoldaý kórsetken Oqý-aǵartý mınıstri Ashat Qanatulyna rızashylyq bildiremiz. Bıyl Memleket basshysy «Balalar jylyn» jarııalaǵany beligili. Sondyqtan biz birinshi kezekte balalar kontentine qoldaý kórsetýimiz kerek. «Balalar jylynda» balalarǵa arnalǵan gazet-jýrnaldardardyń oqyrmandarynyń kóp bolýy, menińshe, búldirshinderge jasalǵan eń úlken syılyq. Ekinshiden, «Qazpochtamen» ortaq memorandýmǵa qol qoıdyq. Bul memorandým sheńberinde basylymdardy oqyrman qolyna jedel jetkizý máselesi qamtylǵan. Post.kz saıtynyń kómegimen onlaın jazylýǵa bolady. Sonymen qatar «Kaspıı» arqly jazylý máselesin de pysyqtap jatyrmyz. Solaı jazylý birshama ońtaıly bolady. Prezıdent ulyqtaý rásiminde aýylǵa erekshe mán berdi. Prezıdenttikke saılanǵannan keıingi birinshi Jarlyǵy aýylǵa qatysty boldy. Sondyqtan aýyldaǵy turǵyndarǵa baspasóz quraldarynyń, gazet pen jýrnaldarymyzdyń jedel jetýi bizdiń nazarymyzda bolady», dedi Aqparat jáne qoǵamdyq damý mınıstri.
Onyń aıtýynsha, qazirgideı kezeńde jedel ári tekserilgen, naqty aqparat taratatyn gazet-jýrnaldarymyzdy jurtshylyqqa, oqyrmanǵa jetkizý máselesi ózekti.
Osy rette Darhan Qýandyquly «Egemen Qazaqstan», «Kazahstanskaıa pravda», «Astana aqshamy», «Turkistan», «Vechernıaıa Astana», «Ulan», «Qazaq ádebıeti» basylymdaryna jazyldy. Jazylý naýqanynan Oqý-aǵartý mınıstri de qalys qalǵan joq. Ol «Ulan» gazeti men «Baldyrǵan» jýrnalyna jazyldy.
«Pedagog mártebesi» týraly zań qabyldanǵanyn bilesizder. Zań aıasynda muǵalimderdi ózine tıisti emes jumystardan bosatý, sondaı-aq ártúrli basylymdarǵa mindettep jazdyrtý máselesin toqtatý boıynsha sheshim boldy. Máselen, qazir ustazdardy senbilikke shyǵarý nemese basylymdarǵa mindettep jazdyrý jaǵdaılary anyqtalsa, osy is-áreketke barǵan azamat ákimshilik jaýapkershilikke tartylady. Sondyqtan biz mundaı áreketterge jol bermeımiz. Biraq bizde «Oqýǵa qushtar mektep» degen jaqsy joba iske asyrylyp jatyr. Osy joba sheńberinde mekteptegi kitaphanalarǵa tek qana kórkem ádebıetterdi satyp alyp jatqan joqpyz, oǵan qosymsha osyndaı balalardyń arnaıy basylymdaryna da jazylyp jatyr. Sondyqtan «Baldyrǵan», «Drýjnye rebıata»» sııaqty basqa da balalar basylymdary mektepterdiń kitaphanalaryna kelip tursa, balalarǵa tıimdi bolady. Osy turǵyda búgin Darhan Qýandyqulymen birge kelip, balalar basylymdaryna jazyldym», dedi Ashat Aımaǵambetov.
Mınıstr muǵalimderdiń basylymdarǵa jazylý máselesin jeke tulǵanyń sheshimi retinde qaraý kerek dep esepteıdi. Sondyqtan bilim berýshilerdi de eshkim mindetteı almaıdy.
«Biraq mektepterdiń arnaıy bıýdjetteri bar, sol bólingen qarjynyń kómegimen mektep kitaphanalaryn balalarǵa arnalǵan gazet-jýrnaldarmen qamtamasyz otyrǵan jón», dedi Oqý-aǵartý mınıstri.
Al Darhan Qydyráliniń sózine súıensek, muǵalimderdiń gazet-jýrnaldarǵa jazylýy úshin basylymdar qyzyqty, paıdaly ári tartymdy bolǵany abzal.
«Oqyrmandardyń kóp bolýy úshin basylymdardyń da sapasy jaqsy bolýy tıis», dedi mınıstr.
Bul rette «Qazposhta» qyzmetkerleri baspasóz quraldaryn oqyrmandarǵa jedel jetkizý jumystaryn júıeleýge baryn salatyndaryn aıtty.
Merzimdi baspa basylymdaryna jazylý naýqany 3 qazannan bastap «Qazposhta» AQ-nyń barlyq bólimshelerinde júrip jatyr.
Statıstıkalyq málimetterge kelsek, 1 jeltoqsandaǵy jaǵdaı boıynsha «Qazposhta» AQ fılıaldarynda 11 mıllıon jazylym tirkelgen. Basylymdarǵa jazylýshylardyń 70%-ǵa jýyǵy aýyldyq jerlerdegi oqyrmandar.
Oblystyq BAQ ókilderiniń qatysýymen jazylýshylardy tartý boıynsha oblystyq fılıaldarda is-sharalar uıymdastyrylyp jatyr. Sonymen qatar Mańǵystaý, Aqmola, Almaty, Pavlodar, Soltústik Qazaqstan, Túrkistan oblystarynda, Astana jáne Almaty qalalarynyń poshta bólimshelerinde Abonent kúnderi ótkizilgen. Mundaı is-sharalar kezinde basylymdar jazylýshylar arasynda utys oıynyn ótkizedi. Qazirgi sátte «Qazposhta» katalogynda 3000 gazet-jýrnal bar.
Aıta keteıik, jazylym naýqany 2022 jyldyń 25 jeltoqsanyna deıin jalǵasady.
