Qadyr ortalyǵynyń «Eleýli esimder» atty dástúrli jobasy aıasynda ótken is-sharaǵa halyq kóp jınaldy. Kesh ıesin ortalyq dırektory Baýyrjan Halıolla quttyqtap, Batys Qazaqstan oblystyq Mádenıet basqarmasynyń jáne Qadyr ortalyǵynyń atynan Alǵyshattar men estelik syılyq tabys etti.
Sahna tórine Memlekettik syılyqtyń laýreaty, «Otan» jáne «Qurmet» ordenderiniń ıegeri, aqyn Aqushtap Baqtygereıqyzy shyǵyp, qalamdas inisi týraly tolǵana sóz sóıledi. Qalamgerdi jerlesteri – Aqjaıyq aýdany ákiminiń orynbasary Baqbergen Ábýov pen Terekti aýdany ishki saıasat bóliminiń basshysy Raýan Satybaldıevter de quttyqtady.
Osy keshte Baýyrjan Faızollaulynyń jańa qyry – sazgerlik qabileti de kópke tanylǵan sát boldy. Ánderdi Qazaqstan Respýblıkasynyń eńbek sińirgen ártisi Qanatqalı Qojaqov, halyqaralyq, respýblıkalyq konkýrstardyń laýreaty Nurjan Tasbolatov pen Darhan Qulbabaev, «BatysStar» toby keremet oryndady.
Kesh barysynda jazýshy shyǵarmashylyǵy jóninde áserli áńgime órbidi. Ásirese qalamgerdiń eki jyl buryn baspadan shyqqan «Bılenbegen vals» kitaby haqynda oqyrman qaýym, jastar birneshe suraq qoıdy. Avtor olardyń bárine yjdaǵatpen jaýap berip, shyǵarmashylyq sheberhanasy týraly oı bólisti.
Baýyrjan Ǵubaıdýllınniń uly Alpamys Faızolla da áke izin jalǵaǵan jas aqyn, aýdarmashy. Kesh barysynda Alpamys Astana qalasynan Qadyrsaraıdyń kórermen zalyna onlaın qosylyp, ákege arnaǵan óleńin oqyp berdi.
Batys Qazaqstan oblysy
