«JEO jáne jeliler ıesiniń jaýapkershiligine jeke toqtalǵym keledi. Qunsyzdanýy 90 paıyzdan asatyn Ekibastuz jylý elektr ortalyǵyn memleketke 1 teńgege satý týraly usynysty tekserý qajet. Bul nysanǵa táýelsiz aýdıt júrgizý kerek. Ábden tozǵan ortalyqty memleket tıimdi basqara ala ma, eń aldymen, osyny zertteý kerek», dedi Qasym-Jomart Toqaev.
Onyń aıtýynsha, kásiporynnyń 50 paıyzyn alyp, menshik ıesine Jylý elektr ortalyǵyn kúrdeli jóndeýden ótkizýdi tapsyrǵan jón.
«Ekibastuz qalasynyń turǵyndaryna keltirilgen shyǵyndy óteý quny menshik ıesi men respýblıkalyq bıýdjet arasynda bólinsin. Sońǵy jyldary qojaıyndarymen eshteńe jasalmaǵan árbir mańyzdy ınfraqurylymdyq nysandy Úkimet jan-jaqty qarastyryp, sheshim qabyldaýy kerek. Osyndaı jumystardy oblys ákimderi jergilikti jerlerde de júrgizetin bolady», dedi Prezıdent.
Sonymen qatar Prezıdent elimizdegi jylý elektr stansııalarynyń ortasha tozýy 66%-ǵa, al keıbir qalalarda ol qazirdiń ózinde 80%-dan asa qaýipti deńgeıden asyp ketkenin málimdedi. Onyń aıtýynsha, JEO-nyń úshten biri jarty ǵasyrdan astam ýaqyt jumys istep keledi. Máselen, Shyǵys Qazaqstan oblysynyń Rıdder jáne Shemonaıha qalalarynda jylý jelileriniń ábden tozyǵy jetken. Osy rette Qasym-Jomart Toqaev Úkimetke energetıkalyq nysandardy ýaqtyly jańǵyrtýdy baqylaýǵa alýdy birneshe ret tapsyrǵanyn eske saldy. Ákimdikter de bárin Úkimetke júktep, keri shegine almaıtynyn jetkizdi.
«Meniń tapsyrmam boıynsha Prezıdent Ákimshiligi janynan qurylǵan arnaıy komıssııa keshendi sharalar ázirledi. Soǵan sáıkes baqylaý-qadaǵalaý tetigin kúsheıtip, menshik ıeleriniń jaýapkershiligin jáne jalpy salanyń tıimdiligin arttyrý qajet. Komıssııa durys jumys istemeı turǵan 19 jylý elektr ortalyǵyn anyqtady. Olardy shuǵyl jańǵyrtý qajet. Aldyn ala esep boıynsha oǵan shamamen 90 mıllıard teńge kerek. Bul qarajat, árıne, energetıkalyq kásiporyndardyń tarıftik smetasynda eskerilgeni jón», dedi Qasym-Jomart Kemeluly.
