Kásiporynnyń óndiristik qýaty jylyna 50 myń tonnaǵa deıin daıyn ónimdi shyǵarýǵa qaýqarly. Jobanyń jalpy quny 20 mln dollar.
Munda daıyndalatyn talshyq sıntepon, tósek toltyrǵysh, jumsaq jıhaz, kıim jáne taǵy basqa ónimderdiń óndirisinde qoldanylmaq. Atalǵan zaýyttyń ókilderi sıntetıkalyq talshyqtyń bul túri uzaq ýaqytqa deıin óz sapasyn joǵaltpaı, joǵary beriktigin saqtaıtynyn aıtty. Sondaı-aq odan jasalǵan zattar jumsaq, jýýǵa jeńil ári tez kebetinin atap ótti. Buǵan qosa olardyń gıpoallergendiligi joǵary.
Kompanııa ókilderi aıtqandaı, kásiporynda óndiriletin ónimniń 90%-dan astamy eksportqa jiberiledi. Qazir daıyn ónimdi ótkizý naryqtary anyqtalyp, sheteldik satyp alýshylarmen aldyn ala kelisimder jasaldy. Sonymen qatar osy jobanyń aıasynda 100-ge jýyq jumys ornyn qurý josparlanǵan.
Bul rette 2019 jyly PET qaldyqtaryn jýyp, keptirý jáne usaqtaý boıynsha atalǵan zaýytta óndiristiń birinshi kezeńi iske asyrylǵanyn aıta keteıik. Sodan beri 30 myń tonnadan artyq PET bótelke ýtılızasııaǵa jiberilip, qaıta óńdeldi. Tutastaı alǵanda, kásiporynnyń qazirgi óndiristik qýaty jylyna 25 myń tonnadan asa PET qaldyqty ýtılızasııadan ótkizip, kádege jaratýǵa múmkindik berip otyr.
Osy oraıda jańa óndiris ornynda hımııalyq talshyqty balqytyp, tartýǵa arnalǵan zamanaýı avtomattandyrylǵan jeliler ornatylǵanyn aıta ketý kerek.
