Mamandyq tańdaýdaǵy mańyzdy tetik

Bilim men biligi ushtasqan, ozyq tehnologııany erkin meńgergen jas­tar – el erteńi. Almaty qalasy Jastar saıasaty basqarmasynyń «Almaty jastary» jobasy aıasyn­da «Social project management orta­lyǵy» qoǵamdyq qory osy baǵytty nysanaǵa ala otyryp, arnaıy semınar-trenıng ótkizdi. Jastardyń jahandaný úrdisine ilese almaýy, ýaqytyn bos dúnıelerge jumsaýy, eńbek aqynyń az bolýy, ata-anamen aradaǵy syılastyqtyń azaıýy qulyqsyz jastardyń qataryn molaıtqan. Almaty ákimdiginiń Ha­lyqty jumyspen qamtý orta­lyǵy­nyń málimetine súıensek, 2022 jyl­dyń ekinshi toqsanynda qalada turaqty jumysy joq jastardyń úlesi 5,8 %-dy quraǵan. Olardyń bári jumys joqtyqtan sendelip júr deýge aýyz barmaıdy.

– Jastar – qoǵamnyń qozǵaýshy kúshi. Bolashaq bilimdi, básekege qabiletti urpaqtyń qolynda. Maǵjan sengen, el sengen jastar qandaı bolý kerek? Osy máseleni sheshý úshin mektepter men joǵary oqý oryndarynda, kolledjer men áskerı oqý oryndarynda psıholog mamandardyń qatysýymen semınar-trenıngter ótkizdik. Semınarda jasóspirimderdi durys mamandyq tańdaýǵa baǵyttap, keıin sol sala boıynsha bilikti maman retinde qyzmet etýge shaqyrdyq, – deıdi «Social project management» ortalyǵynyń dırektory Beıbit Moldahmetuly.

Mamandyq tańdaý – adam ómi­rindegi eń mańyzdy sheshimder­diń biri. Sol sheshimdi durys tańdaý­laryna jol kórsetý maqsatynda ótken kezdesýge jastar belsendi qaty­syp, kókeılerinde júrgen su­raq­taryna jaýap aldy. Elimizdiń eńbek naryǵyn damytý – jastarǵa kóńil bólýden bastalady. Kezdesýde mamandyq tańdaýdyń mańyzdy tetikteri saralanyp, kásibı mamandar baǵyt-baǵdar berdi. Semınarǵa qatysqan stýdentter bolashaqta ózderi tańdaǵan sala boıynsha je­misti eńbek etetinderin tilge tıek etti.

«Jobanyń basty maqsaty – jastardyń jahandaný úrdisine ilesip, ýaqytyn paıdaly isterge arnaýǵa daǵdylandyrý» deıdi semınardy uıymdastyrýshylar. El erteńin eńbekke beıimdeýge baǵyttalǵan is-sharada jastardy memlekettik baǵdarlamalarǵa tartý, kásibı qabiletterin arttyrý, bıznes bastaýǵa baýlý, úkimet tarapynan beriletin granttar týraly aýqymdy aqparat usyný máseleleri qamtyldy.

ALMATY