Juldyzy janǵan Jámıla

Byltyrǵy Barys jyly Baqbergenovanyń kúres álemindegi baq-juldyzyn jaqty. Talaı­lar­dy moıyndatqan Alashtyń arýy 2022 jyly Serbııanyń bas shahary – Belgradta ót­ken álem chempıonatynyń kúmis júldesin moı­nyna ilse, onyń sál aldynda Mońǵolııa asta­nasy – Ulan-Batyrdaǵy Sary qurlyq birin­shiliginde ekinshi márte tuǵyrdyń eń bıik saty­synan qol bulǵady. Álemdik reıtıngte kósh bastap turǵan Jámıla Belgradtaǵy báse­keni shırek fınaldan bastady. Alǵashynda ol ózbek­standyq Svetlana Oqnazarovany 10:0 ese­bimen oısyrata jeńse, jartylaı fınalda otandasymyzdyń joly 23 jastaǵy balýandar ara­syndaǵy álem birinshiligi men Eýropa chempıonatynyń júldegeri rýmynııalyq Alek­sandra Angelmen qıysty. Bul tartysta qazaq qyzy aıqyn basymdyq tanytty – 12:2. Al bas júlde úshin ótken básekede Baqbergenova amerıkalyq Amıt Elorden jeńilip, ekinshi ret álem chempıonatynyń kúmis júldesin moınyna taqty. Ol 2021 jyly Osloda (Norvegııa) ótken jahan birin­shiliginde de altyn medalǵa synyq súıem qal­ǵanda súrinip, ekinshi oryndy qanaǵat tutqan bolatyn.

Al Mońǵolııadaǵy Azııa chempıonatynda jerlesimizdiń juldyzy jandy. Sary qurlyq dodasynyń alǵashqy aınalymdarynda ol úndistandyq Nıkkı Nıkkı jáne ózbekstandyq Svetlana Oqnazarovany jeńse, keıingi báse­kelerde jarys qojaıyny mońǵolııalyq Daava­nasan Enh Amar men úndistandyq Sýmıre Nııkýra Jámılaǵa biraz qarsylasyp baqqa­nymen, qazaqtyń qyzy ekinshi ret Azııa chempıony atanyp, kúlli Alash jurtyn qýantty.

Sonymen qatar ol bıyl Túrkııanyń Konıa qalasynda alaýy tutanǵan Islam yntymaqtastyǵy oıyndarynda da úzdikter qatarynan kórinip, Almatyda uıymdastyrylǵan Bolat Turlyhanov atyndaǵy Gran-prı jarysynda qarsylas shaq kel­tirgen joq. Al osydan birer apta buryn qanda­symyz AQSh-tyń Aıova shtatyndaǵy Koral­vıll qala­synda ótken erkin jáne áıelder kúre­sinen Jer-jahannyń tek úzdik balýandary bel­desetin Álem ký­bogine qatysyp, álem qurama ko­mandasy sapynda bozkilemge shyqty.

Sondaı-aq keıipkerimiz ótken jyldyń sońynda Mádenıet jáne sport mınıstrligi uıymdastyrǵan jyl úzdikterin anyqtaıtyn «Jeńimpaz rýhy» ulttyq syılyǵynyń jeńim­pazy atandy. Ol jazǵy sport túrleri boıynsha «Jyldyń úzdik sportshysy» atalymynda úzdik shyqty.

«Byltyrǵy maýsym men úshin oıdaǵydaı ótti. О́zim qatysqan jarystyń barlyǵynda júldemen oraldym. Bul – jattyǵý men eń­bek­tiń esh ketpegenin kórsetedi. Árıne, álem chempıonatynyń fınalynda bıyl qatarynan ekinshi ret jeńilip, altynǵa qol sozym jer qalǵanda toqtaǵanym azdap qynjyltady. Belgradtaǵy fınalda ne jetpegenin bilmeımin. Biraq álem chempıonatynyń altyny meniń bas­ty maqsatym bolyp qala beredi. Tek qana álemniń emes, Olımpıadanyń da chempıony atanýdan úmittimin», dedi Jámıla Baqbergenova otandyq BAQ ókiline bergen bir suhbatynda.