2021 jylmen salystyrǵanda bos oryndar sany da (+16%) jáne túıindemeler sany da (+73%) ósken. Salalar bólinisinde kadrlarǵa degen qajettilik aýyl sharýashylyǵynda (13,3 myń bos jumys orny), basqa da qyzmet túrlerinde (10,3 myń bos jumys orny) jáne de orta bilim berý salasynda (9,8 myń bos jumys orny) tirkeldi.
«Kóptegen óńirlerde bos jumys oryndarynyń sany artty. Máselen, bir aıda Túrkistan oblysynda bos jumys oryndarynyń sany 15,3 myńǵa deıin jetip, 170%-dy, al Almaty oblysynda 10,6 myńǵa deıin ósip 105%-dy qurady. Bul rette bir aıdaǵy ornalastyrylǵan barlyq bos jumys oryndarynyń 44%-y tórt óńirge (Túrkistan, Almaty oblystary men Astana, Almaty qalalaryna) tıesili», dep habarlady «Eńbek resýrstaryn damytý ortalyǵy» AQ Basqarýshy dırektory Aleksandra Molchanovskaıa.
Vedomstvodan habarlanǵandaı, jeltoqsan aıynda elordadan basqa barlyq óńirlerde izdenýshilerdiń belsendiliginiń tómendeýi baıqaldy. Mysaly, Almaty (-48%), Qaraǵandy (-7%), Shyǵys Qazaqstan (-45%) jáne Túrkistan oblystarynda (-45%) túıindemeler sany azaıdy. Bul rette Túrkistan oblysy (3,3 myń) Almaty qalasy (3,4 myń) men Astana qalasy (5,7 myń) jarııalanǵan túıindemeler sany boıynsha kósh bastady.
«Jeltoqsan aıynda bilikti qyzmetkerlerge joǵary suranys baıqaldy, 55% nemese 58,7 myń bos jumys ornyn usynýshylar jumys izdeýshilerden kásibı biliktiliktiń bolýyn talap etti. Alaıda, bul kórsetkish aldyńǵy aımen salystyrǵanda tómen. Aldyńǵy aıda qajettilik 69% nemese 63,2 myń bos jumys ornyn quraǵan edi. Bul rette biliktiligi joq eńbekke suranystyń 69%-ǵa nemese 19,3 myńǵa ósýi baıqaldy», dep túsindirdi Aleksandra Molchanovskaıa.
Túrkistan (15,3 myń bos jumys orny jáne 3,3 myń túıindeme), Almaty (10,6 myń bos jumys orny jáne 1,6 myń túıindeme) jáne Qaraǵandy oblystary (7 myń bos jumys orny jáne 1,1 myń túıindeme) men Almaty qalasynda (10,3 myń bos jumys orny jáne 3,4 myń túıindeme) mamandardyń tapshylyǵy baıqaldy.
Jeltoqsan aıynda bilikti qyzmetkerler arasynda jyljymaıtyn múlik agentteri (2,9 myń bos jumys orny), áleýmettik qyzmetkerler (1,3 myń bos jumys orny), kúzetshiler (1,2 myń bos jumys orny), sanıtarlar (1,2 myń bos jumys orny), aspazdar (1,1 myń bos jumys orny), sondaı-aq tárbıeshiler men olardyń kómekshileri – tıisinshe 1,1 myń jáne 851 bos jumys orny joǵary suranysqa ıe boldy. Izdeýshiler arasynda negizinen avtokólik júrgizýshileri, satýshylar, býhgalterler jáne zańgerler boldy.
«Suranystyń usynystan jalpy basymdylyǵyna qaramastan, jeltoqsan aıynda vahterler (268 bos jumys orny jáne 561 túıindeme), HR bıznes seriktesteri (22 bos jumys orny jáne 153 túıindeme) jáne dene shynyqtyrý muǵalimderi (106 bos jumys orny jáne 231 túıindeme) aıtarlyqtaı asyp tústi», dep qosty Aleksandra Molchanovskaıa.
О́tinish berýshilerdiń belsendiligi óńirler boıynsha genderlik jaǵynan da ár túrli boldy. Máselen, eger Batys Qazaqstan (69%), Atyraý (65%), Ulytaý (62%) jáne Aqtóbe oblystarynda (61%) er adamdar ózderiniń túıindemelerin jıi ornalastyrsa, al qyzmet kórsetý salasy basym – Shymkent (59%), Astana (53%) qalalary, sondaı-aq Abaı (56%) jáne Almaty oblystarynda (53%) áıelderdiń basymdylyǵy tirkeldi.
Ornalastyrylǵan túıindemelerdiń úshten birine jýyǵy 16 jastan 28 jasqa deıingi jastarǵa (10,8 myń túıindeme), 42% (15,5 myń túıindeme) – orta jastaǵy nemese (44 jasqa deıingi) izdenýshilerge tıesili boldy. Barlyq túıindemelerdiń tek 9%-y (3,3 myń túıindeme) zeınetkerlik jasqa deıingi adamdardan boldy.
EEB málimetterine sáıkes, jeltoqsan aıynda eń kóp jalaqyny bas dırektorlarǵa (~2,8 mln teńge), taýar jınaqtaýshylary (~2,4 mln teńge), tereze montaj jasaýshylar (~1,8 mln teńge) kútken, al jumys berýshiler tarapynan joǵary jalaqy ónerkásip salasyndaǵy seh bastyqtaryna (~832 myń teńge), bas tehnologtarǵa (~700 myń teńge), tehnıkalyq sala basshylaryna (~650 myń teńge) jáne ónerkásiptik alpınısterge (~650 myń teńge) usynyldy.
