«О́zderińizge málim, elimiz damýdyń jańa kezeńine qadam basty. Byltyr konstıtýsııalyq reformany qolǵa aldyq. Ata zańǵa asa mańyzdy ózgerister engizdik. Qarasha aıynda Prezıdent saılaýy ótti. Jýyrda Senat depýtattarynyń bir bóligi saılandy. Sonymen qatar meniń Jarlyǵymmen birneshe senator taǵaıyndaldy. Osymen Senattyń quramyn jańǵyrtý úderisi aıaqtaldy. Depýtattardyń jartysyna jýyǵy jańardy», dedi Prezıdent.
Osy oraıda ol munda ár aımaqtyń, sonyń ishinde jańadan qurylǵan oblystardyń ókilderi baryn aıtty. Qazaqstan halqy Assambleıasynyń múshelerine arnaıy kvota berilgen. Osylaısha, Senatta túrli sanattaǵy qoǵam ókilderi barynsha qamtylǵan.
«Jalpy bul Palata memlekettik basqarý salasynda aıryqsha ról atqarady. Oǵan Konstıtýsııaǵa sáıkes mańyzdy mindetter júktelgen. Zań shyǵarý qyzmetin sapaly atqarý úshin barlyq jaǵdaı jasalǵan. Palata óz jumysyn abyroımen atqaryp kele jatyr. Senatorlar aýqymdy reformalardy júzege asyrýǵa belsene atsalysty. Osy oraıda, barshańyzǵa shynaıy rızashylyǵymdy bildiremin. Jańa depýtattar Senattyń qyzmetine tyń serpin beredi dep senemin», dedi Memleket basshysy.
