«Kez-kelgen saıası múddege qaraǵanda memleketshildik qasıet áldeqaıda bıik turýǵa tıis. Qoǵamǵa, eń aldymen, árbir sózine jáne isine jaýapkershilikpen qaraıtyn saıasatkerler qajet. Sonda azamattardyń eldik saıasatqa degen senimi artady. Al, senim – bul asa mańyzdy qundylyq», dep atap ótti Prezıdent.
Qasym-Jomart Toqaevtyń aıtýynsha, bizdiń elimizge zań ústemdigi jáne azamattyq tártip asa qajet.
«Baýyrjan Momyshuly «Tártipke baǵynǵan qul bolmaıdy» dep aıtqan. Zańdy syılaıtyn eldiń qashanda upaıy túgel. Shyn máninde, tatýlyq pen turaqtylyq eń asyl qundylyq ekenine bárimiz kóz jetkizdik. Tynyshtyq bolmasa, basqa tabystyń bári bir sátte qurdymǵa ketetinin kórdik. Biz el birliginiń arqasynda barlyq qıyndyqty jeńip kelemiz. Sondyqtan bardy baǵalap, yrysty yntymaǵymyzdy qorǵaý – bárimizge ortaq qasıetti borysh», dedi Memleket basshysy.
Bul rette Prezıdent Qazaqstan saıasatkerleriniń basty maqsatyn atady.
«Maqsatymyz – Qazaqstandy tuǵyry berik, ekonomıkasy qýatty, rýhy asqaq, birligi bekem memleket retinde urpaqqa tabystaý. Osy tarıhı mindetti bárimiz birge abyroımen atqaryp shyǵamyz dep senemin», dep túıindedi Prezıdent.
